Tambagi ko Noy Kulas: Nagdumot

DEAR Noy Kulas,

Tagua lang ko sa ngan nga Capricorn. Bisan i-enjoy na nako ang akong kaugalingon sa akong mga barkada, kauban sa trabaho ug mga tawo sa akong palibot, pero still ang kasuko nagpabilin lang gihapon. Kasuko nako sa mayordoma sa balay sa akong auntie.

Sa panahon nga nag-stay pa ko sa balay sa akong auntie, ako ra pirme bantayan sa mayordoma. Usa na, Noy, kon naa ra ko sa balay ug naa sab ang mayordoma, di ko kabuhat sa sa akong gusto nga buhaton. Sama kon gusto ko nga motan-aw og TV. Di ko katan-aw kay wa ang remote. Gitagoan sa mayordoma.

Ikaduha, di ko mabuhat kanang mokaon ko kay gitaguan ang sud-an. Pero ang mayordoma mabuhat niya tanan nga iyang gustong buhaton. Pariha nag maglantaw og TV gikan sa tindahan tapos niya manihapon. Makakita na lang ko, nga sitting pretty pa.

Bahin ani nako nga problema, wa kahibawo ang akong auntie. Nihawa na lang ko sa ilaha.

Please tambagi ko. Salamat kaayo.

CAPRICORN

Capricorn,

Maglisod ta pag move on kon ingon niana kanunay ang atoang buhaton. Ang milabay nakalabay na. Bisan unsa pay imong buhaton, miagi na gyud na. Di gyud maayo nga magdumot kita sa ubang mga tawo nga sa atong tan-aw nakahimo og sala kanato, intentional man o di. Kay kon magdumot ka, sa mga mata sa Diyos, wa na moy kalainan. Kamong duha pulos di maayo og binuhatan. Siya sa iyang pagpamintaha ug pagdinawo samtang ikaw sa imong pagdumot kaniya.

Niadto untang higayuna imo siyang giprangkahan sa imong obserbasyon o imong gisultihan ang imong iyaan sa di maayong gibuhat sa mayordoma kanimo. O ba kaha gipaagi nimo sa laing sakop sa inyong pamilya aron ang imo nang auntie ang mosilot kaniya. Apan sa ako nang giingon nakalabay na man gud na. You have a better life kay niya kay tuod siya mayordoma, apan helper man gihapon siya. Ikaw usa na ka professional.

Ayaw na sab kanaog ngadto sa iyang level.

The best thing you can do is ayaw gyud pagbuhat sa iyang gibuhat. Kay nakita man kini nimo nga di gyud maayo, di ba? Ganahan ka ba nga duna say tawo nga magbaton og pagdumot kanimo? Pasayloa siya sa iyang gibuhat. Move on.

Noy Kulas

Alang sa imong problema, e-mail lang sa: kulassuper@sunstar.com.ph o sa rojval69@yahoo.com. Suwat sab sa: Tambagi Ko, Noy Kulas, Sun.Star bldg., P. del Rosario st., Cebu city