Sugilanon: Nangandoy sa pasaylo

Renato S. Pono, Sr.
Mantuyong, Mandaue City

GIBUWAGAN ni Maricel si Boyet nga iyang bana taudtaod na karon. Dulot gayud sa bukog ang iyang panaad nga di na makig-uli pa sa iyang bana nga nanubra ka-badjimoy sa mga babaye. Himabayeng dako. Dako niyang pagmahay nga napunta hinuon sa lalakeng dukirok sa lab-as nga ‘unod.’

Nasayod si Maricel nga may anak sa gawas si Boyet. Apan alang kaniya ordinaryo na kaayo kini karong panahuna. Ang gikapungtan og maayo ni Maricel kay sa pipila ka tuig nilang panag-ipon, daghang mga babaye ang nahilambigit sa kinabuhi ni Boyet. Ulahi na siyang nasayod. Wa hinuon kini ikulipas ni Boyet.

Maghilak ang semana kon di sila magkalalis o magkaaway gumikan sa babaye sa iyang bana. Dihay usa ka tungang gabii kanus-a mipauli si Boyet nga nakainom-inom. Wa ikatrangka ang pultahan sa iyang pag-abri. Labihang sukoa ni Boyet.

“Maricel! Nganong wa nimo sirad-i ang pultahan?” singgaak ni Boyet nga maoy nakapaulpot sa iyang asawa.

Mibangon si Maricel. “Nagtuo ko nga di ka magdugay sa gawas, maong wa nako itrangka ang pultahan!”

“Ahhh, binuang! Ingna hinuon nga imong gipasud ang imong kabit!”

“Unsay kabit, ha?” misinta si Maricel. “Di kaha ikaw… nga wa ug tuo ang kabit? Ang imong binuhatan imong ipahid nako! Sus, kawaa nimoy uawaw! Baga kag nawong!”

SUKAD mibiya si Maricel nahimong magul-anon si Boyet, ilabi na nga gidala sa iyang asawa ang duha nila ka anak, si Hanna ug Elmer. Tinuod, giangkon niya ang tanang kasal-anan nga iyang nabuhat. Apan ang hukom ni Maricel di na gyud malubag ug matuis.

Usa ka sitsirikang batan-ong babaye gikan sa Manila ug nagserbisyo sa bar ang gikabagat ni Boyet sa Langob (dapit nga imnanan ug bidyukihan).

“Kini, bahalag mamatay ko basta sa ibabaw sa kamay,” sa hunahuna ni Boyet nga naglaway sa subrang kahinam.

Human magkailhanay kanunay na silang mag-abot, hangtod nga mikuyog ang seksing babaye kang Boyet aron makigpuyo. Apan wa pa ganiy duha ka semana sa ilang panag-ipon, nawagtang ang babaye. Igo ra siyang gipanguwarta ug gipangahuyan sa iyang mga butang.

Ang nakapait kay naglisod na siyag pangihi karon. Sakit. Tinagidyot ug may sagol pang dugo. Nakapanglingo siya sa iyang ulo. Sakit kini sa babaye ug miabot na ang akong gaba, nagmahay siya sa hilom. Iya kining gitago kay maulaw siyang ingnong ‘nasira’ sa babaye. Milamay ang iyang sakit. Sakit na hikapon ang iyang pus-on. Midaot siya ug nangluspad. Taliwa ning tanan, may pangandoy pang naglumlom sa iyang dughan, nga iyang ikaatubang si Maricel aron pangayoan niya sa bendisyon sa pasaylo, una siya motalikod sa kalibutan. (KATAPUSAN)