Serna: Wait-and-see mode ang show
-A A +ANi Roger Serna
Kyaw-kyaw
Saturday, July 28, 2012
PASTILAN! Na-guilty kog di oras alang kaninyo mga suking magbabasa. Aw, duna ba? Syarog wa gyud no? Duna man gani mo-text gyud nganong wa molugwa ang akong lindog. Naa sad tawn uy.
Unsaon nga napuno man ang akong mga kamot sa mga gimbuhaton mao nga wa na gyud makalugar og dukdok sa keyboard. Pero gipaningkamotan gyud nga makabawi. Mao nga mao na ni.
***
Naa pa gyud koy laing na-guilty-han. Si Batman. Unsaon nga ako man to siyang gihagit nga magkita mi sa Imax Theater niadtong miaging semana unya kay nagabhi-an man kog balik sa syudad kay nalingaw pagpakig-bonding sa akong mga paryente sa bukiran sa Tumalog, Oslob.
Pasensya, Batman, ha? Basin karon na gyung semanaha ta magkita. Anà lang. Sa mga wa masayod, childhood hero ni nako si Batman. Nakahinumdom ko nga duna gani koy bag pang-eskwela nga si Batman ug Robin ang naa sa atubangan.
Mao na nga seguroon gyud nako pagtan-aw kon may pelikulang mahitungod ni Batman (asa na kaha si Robin karon?) kay makahinumdom ko sa mga malipayong mga adlaw sa akong kabatan-on. Yiiii, kagilok! Haha!
***
Unsa kahay paukyab aning pelikulang The Healing ni Vilma Santos ug Kim Chiu nga morag nakilig man gyud ang Star For All Seasons? Naatol man kaha ni sa iyang ika-50 nga kasumaran sa pamelikula mao nga morag iring gibidli intawn ang gobernadora sa Batangas.
Sige. Kaming Gob. Vi na say magkita sunod semana. Haha!
***
Lahi sa mga nangaging pagsaulog sa Press Freedom Week matag Septyembre diin ang Cebu Entertainment Media Group (E-Group) anha ra kutob sa pagpahigayon sa Ms. Press Freedom (diha sab toy Mr. Press Freedom kadiyot) unya mahilom lang sab dayon samtang magdagan ang kasaulogan, karong tuiga morag mga iring gibidli ang mga sakop kay morag pursigido.
Una, pabonggahag gamay ang pagpili sa Ms. Press Freedom (morag ibalik sab gani tingali ang Mr. Press Freedom kon way kakuli-an) nga himoon sa usa sa mga bag-ong hotel sa syudad sa Sugbo. Di pa lang dugay, nahisgutan nga dinapit nga maglilingaw ang grupo nga La Diva. O-ha!
Unya nagplano sab nga puslan mang nag-aktibo (kuno!), moapil na lang gyud sa closing ceremonies diin magtigi ang lainlaing mga grupo sa industriya. Gani, duna nay gikasabot nga choreographer ang usa sa mga sakop. O-ha! Kana kon di atakihon sa kaspâ ang mga sakop sa E-Group.
Bantay bitawg mabugnaw na sab. Moambak na gyud ko gikan sa akong condo unit. Haha! Naa ba? Mao bitaw nang di ko mokuhag condo unit kay gawas nga di nako makaya pagbayad, makahunahuna sab nya kog ambak (morang Batman?). Paet!
***
Nakabantay mo nga pulos taga GMA 7 ang akong nasulat karong uwahing mga semana? Unsaon nga di na man mangimbitar ang taga ABS-CBN sa ilang mga kalihukan o kon dunay artistang mobisita.
Ambot unsay nakaon sa ilang mga dakodako sa kaulohan. Wa man kunoy mahimo ang mga taga Sugbo kon di gyud gusto sa taga Manila. Mao ba? Gani morag dunay artistang Kapamilya nga nia karon sa Sugbo apan, sama sa nangagi, mora lag wala.
Aw, di man sab hinoon magsakit among tiyan. Kon akong huwaman ang linya ni Dodong Bandibas: ‘Care ko ba!’ Pero sa miaging tuig, gipalupad baya gyud ang pipila ka sakop sa E-Group ngadto sa kaulohan aron mahisgutan kining mga butanga ug uban pang mga reklamo di lang sa mga taga Sugbo, lakip na sab ang mga taga Mindanao, pero wa man gihapoy nahitabo.
Karong bag-o nagpadala ang E-Group og sulat kang Bong Osorio aron ipadangat ang sitwasyon nga way kausaban ug gani nagkagrabe. Misaad si G. Osorio nga iyang pakigsulti-an ang iyang mga sakop (lakip na ang taga Sugbo) aron paghilot niini.
Sa kasamtangan, wait-and-see mode ang show sa E-Group. Anà.
Gipatik sa mantalaang SuperBalita Cebu Hulyo 29, 2012.
Kalingawan
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
