Lalake miparakyut, gipalid sa hangin, patay

AIRCRACT mechanic nga missing sulod sa duha ka mga adlaw human sa skydiving uban sa iyang mga higala niadtong Sabado sa buntag nabangalan kagahapon sa alas 12:30 sa udto nga naglutawlutaw sa kadagatan sa may Kawit, South Road Properties (SRP) sa dakbayan sa Sugbo.

Ang biktima giingong gipalid sa hangin samtang nagparakyut. Ang Sugbo nakasinati og kusog nga hangin nga habagat sukad pa sa miaging semana.

Si Ronald Mendez, 30, minyo, freelance aircraft mechanic, taga Tagbilaran, Bohol, patay nang nakit-an sa usa ka Bantay Dagat volunteer nga nag-monitor sa kadagatan sa SRP.

Si SPO1 Ruth Violango, imbestigador sa Homicide Section sa Cebu City Police Office (CCPO) nga nahinabi sa Sun.Star Superbalita, nagkanayon nga ang biktima nakit-an ni Juanito Escabas.

Sumala ni Violango nga si Escabas nagsakay sa pumboat dihang duna siyay nakit-ang tawo nga naglutawlutaw mga 30 metros gikan sa iyang nahimutangan, Iyang gitawag niya ang iyang duha ka mga kauban dayon giduol ang lawas ug gihigtan og pisi dayon giguyod sa daplin.

Si Violango nipadayag nga niadtong Sabado nagpahigayon og sky diving ang biktima uban sa iyang lima ka mga higala nga sakay sa Cessna Plane 206 diin sila nanukad sa SRP.

Samtang ang Cessna plane niabot sa 60,000 ka tiil sa kahanginan, nangambak ang biktima ug ang iyang mga kauban.

Apan ang biktima ug iyang kauban nga si Frederico Albacite nabuwag sa grupo kay sila nangapalid sa hangin.

Gipadayag niya nga sila si Mendez ug Albacite nimaneho sa ilang mga parachute apan bisan pa man niini wa sila makatugpa sa may SRP ug napalid sa hangin ngadto sa dagat.

Ang biktima kalit nga nahanaw ug ang parachute na lang niya maoy napalgan niadtong Sabado sa kagadatan sa SRP samtang si Albacite na rescue.