Mga langgam sa Ocean Yard (Naga City, Cebu)

Ernesto D. Lariosa
San Fernando, Cebu

1.
Way larawan sa kapuol
Ang malantaw dinhi sa Ocean Yard
Kay inigbukas sa kabuntagon
May mga langgam nga makita nagkukabildo
Sa kaugalingon nilang pinulongan
Samtang may gipangita nga bililhon
Sa lapad nga nawong sa yuta.

Wa sila manumbaling sa huros sa hangin
Ug sa paglantong sa dagat
Kay andam man ang ilang mga pako
Mobukhad aron molupad lagbas sa seawall
Palayo ngadto sa kabungtoran
Nga hilom naghuwat karon kanila
Kana kon may mangahas sa pag-abog
Hasion sila sa mga mahilabtanon.

2.
Apan way nanagad sa mga langgam karon
Ang matag usa nagpahimulos sa halad
Sa matahom nga kinaiyahan
Pagsaulog sa mapiskay nga kinabuhi
Busa dagan-dagan sila didto duwa–duwa diri
Sa makatagbaw nga pagpasingot sa kaugatan
Ako ray nakamatikod sa mga langgam
Kay naglakaw-lakaw lang ko sa sidsid
Sa salaming dagat nga andam mosawo sa langit.
Sama nako madasigon silang naglihok
Nga gawasnon buot sapwangon sa huyuhoy
Dinhi sa sabakan sa Ocean Yard.