Kon ikaw pahukmon: Kumpare

SI Binoy kumpare sa inahan sa 13-anyos nga si Sheila nga si Loida. Usa niana ka adlaw, samtang nagduwa sila sa iyang ig-agaw, si Binoy nakit-an ni Sheila nga nagtindog sa kilid sa bentana sa balay niini. Gitawag dayon siya niini aron kunohay suguon sa pagsugal sa ending game.

Giduol niya si Binoy, kinsa nikalit lang pagbitad sa iyang mga bukton ug gidala siya sa balay niini. Sa sulod sa balay sa akusado, gihuboan siya sa sapot ug panty. Sunod nga naghukas ang akusado.

Gihikap siya ni Binoy, apil na ang pribadong bahin sa iyang lawas. Gibuong dayon sa akusado ang iyang pagkababaye. Gibati niya ang grabe nga ka sakit. Nihilak siya dihang nakakita siya og dugo sa pribadong bahin sa iyang lawas.

Wa siya mosumbong tungod sa iyang kahadlok sa akusado, kinsa nition kaniya og hait kaayo nga kutsilyo. Sa wa pa diay mahitabo ang gi-rape, gihinol na siya ni Binoy.

Human sa rape, wa na gyud siya mopaduol pa sa balay sa akusado.

Paglabay sa duha ka mga adlaw, nibalik siya sa pagtungha. Apan nakatulog siya sulod sa classroom tungod sa iyang kasakit sa iyang ulo ug kalawasan. Gisumbong siya sa iyang igsuon nga lalake ngadto sa ilang inahan nga kanunay lang siyang matulog sa classroom panahon sa tingklase.

Dihang gikomprontase siya sa iyang inahan, didto na siya nitug-an sa linuog nga gibuhat ni Binoy kaniya. Nisumbong dayon ang iyang inahan sa kapulisan sa nahitabo sa iyang anakak.

Si Loida nakabantay na diay sa iyang anak nga ingon sa “tulala” kanunay. Di kini motubag sa iyang mga pangutana.

Sa husay sa kaso, ang akusado nga maoy bugtong saksi, nangatarungan nga tinuod kaila niya ang mga ginikanan ni Sheila sulod sa unom ka mga tuig. Managsilingan ra sab sila.

Apan dihang nahitabo ang giingon nga insidente, wa siya sa mao nga dapit kay nagtrabaho siya sa usa ka balay gikan sa buntag hangtod sa alas 9 sa gabii.

Apan iyang giangkon nga ang iyang balay malakaw lang sulod sa 20-30 minutos.

Busa, imposible bang di mabuhat sa akusado ang pasangil batok kaniya? Lig-on ba ang testimoniya sa biktima batok kang Binoy? Sad-an ba ang akusado sa kasong rape nga iyang giatubang?

Hukom sa kasong arson

Sa mga ebedensya, sama sa abo sa nasunog nga payag, nakita sa korte nga dunay krimen nga nahitabo. Nakita usab sa hukmanan ang katuohan kaayong pamahayag sa magsuon nga ning-ila sa mga akusado nga mao ang ningsunog sa payag sa ilang amahan.

Tungod usab sa special aggravating circumstance, gipahamtang kanila ang labing bug-at nga silot nga mao ang reclusion perpetua.