Tambagi ko Noy Kulas: House and lot

DEAR Noy Kulas,

Ako si Inday, 49, adunay tulo ka mga anak. Sila pulos di na menor de edad pero wala pa nangaminyo. Ang akong problema bahin sa akong yuta ug balay nga gusto nako ibaligya.

Apan nagduha-duha ang buyer sa pagpalit kay lagi conjugal property. Mahadlok sila nga makasuhan sa akong bana kon mahibawo kini nga among gibaligya.

Ang akong bana tua sa Saudi Arabia. Sukad sa among pa­nagbulag usa ka tuig na kapin ang nilabay, wala na nagsuporta nako ug sa iyang mga anak. Mao nga ania na kami gapuyo karon sa Sugbu kay iya mi gipalayas sa among balay didto sa Mindanao.

Among nahibaw-an nga didto na siya magpadad-anan sa iyang kwarta sa iyang kabit kay kaning bayhana mao sad nagpadala sa akong kamanghurang anak pinaagi sa MLhuillier atong panahon nga nangayo kini og kwarta sa iyang amahan para sa iyang tuition.

Nagkasabot kami sa akong 3 ka anak na among ibaligya ang yuta ug balay na among gibiyaan didto sa Mindanao kay wa naman siya misuporta namo. Aduna ba akoy katungod uban sa akong mga anak sa pagbaligya without sa consent sa akong bana?

INDAY

Inday,

Komplikado man ning imong legal nga pangunata kay parte man ni sa property gud. So, gikinahanglan ninyo ang abogado aron matambagan mo.

Kon gusto mo og libre nga consultation, duaw mo sa Public Attorney’s Office (PAO) o pangutana mo sa inyong kaila kon duna ba silay abogadong kaila nga di kaayo mahal og consultation. Anyway consultation ra man sab na. Kay mosugot mo o di, sa inyong pagbaligya og property, nagkinahanglan mo og abogado.

Kon nagkabuwag mo sa imong bana sa legal nga paagi, unya inyong gitarong og bahin ang properties, mahimo nimo nang mabaligya ang balay ug yuta kon iya ning gihatag nimo. Apan kon nagbuwag mo in principle lang, di sa legal nga paagi, ang property magpabilin nga inyong duha. Di iyaha ra, di sab imoha ra.

But estoryahi ang imong bana parte sa imong plano. Kon gusto ka og minaldito, sama sa tambag sa akong amigong abogado sa usa nako ka letter sender, pasukipi og hulga nga ikiha siya sa iyang pagpangabit. Labina kon duna kay ebedensya nga naa na siyay gipuyo nga laing babaye. Kon one year pa na, mahimo pa nimo silang magukod sa ilang relasyon. Try Facebook kay basin naa sila.

Sa ako nang giingon, konsulta og abogado aron magiyahan ka unsay imong buhaton. Mas nakahibawo ang abogado kalabot sa unsay buhaton ninyo sa inyong properties. Kana kon duna pa sab moy laing kabtangan. Mas duna kay advantage when it comes to properties kay nangabit man siya. Siya ang sad-an busa ang balaud sa kaminyuon naa nimo.

NOY KULAS

Alang sa imong problema, e-mail lang sa: kulassuper@sunstar.com.ph o sa rojval69@yahoo.com. Suwat sab sa: Tambagi Ko, Noy Kulas, Sun.Star bldg., P. del Rosario st., Cebu city