Serna: Panahon karon sa pagtinabangay

SA makausa pa, gisuwayan na sab asa kutob ang atong pagkamaluloy-on, pagkamaunongon, pagkamatinabangon ug pagkamanggihatagon. Pipila na ka adlaw nga mao ra gyuy atong makita sa telebisyon ang mga eksena diin ang atong mga igsoon sa Metro Manila ug mga silingang lugar nagsangkiig intawn sa baha.

Igo ba lang tang mohunong ug motutok kadiyot unya mopadayon lang sa atong mga tagsatagsa ka gimbuhaton nga wa gani molihok aron man lang matibhangan ang ilang pag-antos?

Mas maayo man kaha nga kitay motabang kay sa kitay tabangan? Pwes, molihok ta sa bisan unsang paagi. Daghan ang nanawat og mga hinabang aron mapadala ngadto sa kaulohan.

Kon duna tay ikahatag (pagkaon, sapot, habol, salapi, ugbp.), di kini nato ihikaw. Himoon nato nga makalingaw ang pagtabang sa mga nanginahanglan aron sa ingon, mapamatud-an nato nga ‘it’s really more fun in the Philippines’, sa bisan unsang sitwasyon. O-ha! Anà!

***

Mga pahalipay ngadto sa maanyag nga nagdala sa ngalan sa Talisay City nga maoy nakalangkat sa korona isip Pasigarbo Festival Queen 2012 nga gipahigayon sa Cebu International Convention Center niadtong Miyerkules.

Susamang pahalipay ngadto sa mga representante sa Moalboal, Minglanilla, Carmen ug Mandaue City nga maoy nahimong mga dama. Makita kini sila nato pag-usab ugma nga mangulo sa ilang tagsatagsa ka mga local government units sa Pasigarbo sa Sugbo Festival of Festivals sa palibot sa CICC.

Sa laing bahin, mga pahalipay usab diay sa grupong The Executives nga maoy midaug sa production number contest niadtong Lunes nga gitawag og ‘Kapitolyo, Mosayaw Sab Diay Ka?’. Hip-hop ang gisayaw sa maong grupo.

Midaug usab ang Legislators ug Builders nga mipasundayag og Broadway ug cha-cha. Alegre.

***

May usa ka higala nga misaway sa acting ni Vilma Santos sa The Healing kay inferior ra kini kon itandi sa iyang unang mga pelikula sama sa Anak, Bata, Bata Paano Ka Ginawa ug uban pa.

Morag may punto ang akong higala nga nisaway ni Ate Vi. Nindot ang pelikula pero wa kaayo magamit ang pagkamaayong artista sa Star for All Seasons.

Makaingon tang bisan kinsang artistaha makadala sa maong papel nga susama o gani mas labaw pa tingalig impact kay sa dinad-an sa gobernadora sa Batangas.

Sa laing bahin, mas dako alang nako ang papel ni Martin del Rosario dinhi kay sa kang Kim Chiu. Nindot usab ang dinad-an ni Martin kay ni Kim.

May mga sitwasyon nga nindot tan-awon ang facial expressions ni Martin bisan pag wa kini speaking lines. Hinaut nga mahatagan kini siyag mas nindot nga mga proyekto sa umaabot.

Akong nalantawan nga usa kini si Martin sa mga mamahimong maayo ug premyadong batan-ong aktor sa umaabot.

***

Morag si Jeremy Renner ug Rachel Weisz uban nila ni Rica Peralejo, John Arcilla, Lou Veloso ug uban pa ang ako na usab nga pakigkitaan karong Sabado. Kini tungod kay naikag na sab kog tan-aw sa The Bourne Legacy diin dunay mga dagkong esena nga didto sa Manila gi-shooting.

Nakakita man god ko sa mga nahaunang pelikulang Bourne diin si Matt Damon pay nagdala sa bida. Gusto kong makakita unsay atake ni Jeremy sa maong papel. Anà.