Kon ikaw pahukmon: Ang mananagat

MGA alas 2:30 sa hapon niadtong Pebrero 2003, niabot si Celso sa balay gikan nga nanagat. Didto sa taas sa balay mao si Liza ug iyang mga manghod, mga anak sa kapuyo ni Celso. Wa diha si Loida kay didto pa kini sa trabahoan.

Nisaka si Celso ug kalit niyang gibunlot si Liza ngadto sa silong sa balay. Gipugos siya sa pagpahigda ni Celso sa sawog. Gihukasan siya sa akusado sa tanang sapot samtang nagsige siya og hilak. Wa gyud maminaw ug maluoy si Celso bisan sa iyang pagpakiluoy.

Naghukas usab si Celso ug giangkon ang iyang pagkababaye. Wa gyud siyay nahimo kay gihakop siya sa tumang kahadlok sa iyang ama-ama. Gihulga siya nga patyon ang iyang mga manghod kon mosulti siya ni bisan kinsa sa iyang gibuhat.

Nag-ilis si Liza ug nisaka og balik sa taas sa balay.

Si Liza nitug-an nga nausban pa kini paglabay sa usa ka semana. Diha ang iyang mga manghod apan gisugo sila ni Celso sa pagbahig sa mga isda ug pasayan. Wa gihapon diha ang ilang inahan dihang gihilabtan siya sa ilang ama-ama.

Niadtong Disyembre 5, 2003, mga alas 5:30 sa buntag, ang akusado nibitad na sab kang Liza ngadto sa silong sa balay ug ngadto sa katre. Gipahimudsan na sab siya sa iyang ama-ama. Human niini, nag-ilis ang akusado aron managat samtang siya gibiyaan nga nag-antos sa kasakit. Gihulga na sab siya sa akusado nga patyon ug ang iyang mga igsuon kon motug-an sa gibuhat.

Kay wan a makaantos, nisulti si Liza ngadto sa iyang inahan sa gibuhat kaniya sa iyang ama-ama. Tulo lang ka mga insidente ang iyang nahinumdoman apan matod niya makadaghan siya hilabti sa akusado.

Si Celso, sa iyang bahin, niingon nga imposibleng mabuhat niya ang duha ka mga insidente sa rape tungod kay kanunay siyang managat kay mao kini ang tinubdan sa ilang panginabuhian. Iyang giakusahan ang usa ka Richie, kinsa sinagop sa iyang kapuyo, nga maoy nilugos kang Liza. Gani iyang gisultihan ang iyang kapuyo sa gibuhat sa sinagop niini, apan wa kiniy gibuhat.

Hinuon, ang usa ka insidente iyang giangkon, apan matod niya nga ila kadtong sinabutan. Matod niya nga duna na silay relasyon ni Liza ug duna nay sexual nga relasyon sukad sa Agusto sa mao nga tuig.

Motuo ka sa lusot ni Celso ning tulo ka mga kasong rape nga gipasaka batok kaniya? Posible kahang duna silay relasyon sa iyang humagbos? Kon ikaw ang pahukmon, sad-an ba si Celso sa tulo ka mga kaso nga iyang giatubang?

Hukom sa kasong rape

Ang akusado, kinsa nilugos sa anak sa iyang kumare, napalgang sad-an sa kasong rape nga gipasaka batok kaniya. Napalgan sa korte ang kahuyang sa iyang alibi nga wa siya sa iyang balay dihang nahitabo ang krimen kay duna siyay gitrabahong balay.