Talk to Papa Joe: Naibog ang minyo

DEAR Papa Joe,

Tawga ko sa ngalang Aileen, taga Mandaue City, 17 years old. Ang akong problema mahitungod sa among silingan nga driver na nanguyab nako.

Maayo unta og ulitawo pero minyo ni siyang dako. Iya ko usahay atangan sa akong trabahuan ug pasakyon sa iyang gimanehong jeep. Dili ta ko ganahan nga mosakay kay lain paminawon pero basin og maiskandalo na hinuon og samot.

Unya di ko niya ilahos sa amo kay iya kong bangkahan og snacks. Dili gyud ta ko mosugot pero mamugos man kay nahigugma lagi daw siya nako. Ako siyang giingnan nga if dili siya mohunong ako siyang itug-an sa iyang asawa. Pero iya kong giingnan basta motug-an ko maghikog kuno siya ug iyang ipanabi nga naay nahitabo kanamo kay naa man sab miy picture nga kaming duha pero picture ra gani to.

Unya kon ako siyang likayan kay mo-text siya nga if di ko makigkita niya, moadto siya sa amoa unya maikog baya ko kay nangipon ra baya ko sa akong tiya. Unsa kahay akong buhaton nako ani nga maundang siya kay ang iya bayang asawa kaila nako. Bisan wala koy gibuhat nga dautan, mauwaw na hinuon ko motan-aw sa iyang asawa. Palihug tawon tambagi ko.

AILEEN

Aileen,

Di man sad ka ma-blame no kay linghod pa ang imong hunahuna. Under age pa man gani ka ug tan-aw ko tubong probinsya ka kay nangipon man ka sa imong tiya ug mahudlukon. Kay kon taga city ka, medyo maru na ka manginsulto sa driver sa iyang gibuhat nga pagsayonsayon nimo.

Ako pa nimo, imo siyang sultihan nga pwede nimo siyang pasakahan og kaso kay menor de edad ka pa ug mas maayo nga imong paanhaon sa inyo ug isumbong sa imong tiya para makat-on nang tawhana og leksyon.

Di man sad ingon nga naa moy picure naa nay nahitabo ninyo. Gulat ra na niya, iya rang gilingin imong ulo ana. Kon mahimo, ipabaranggay na. Basin sa kahadlok nimo unya, huyang baya ang babaye, basin og panamastamasan na hinuon ka ana ug ulahi na ang tanan. Ayaw kahadlok, Day, kay gawas lang og nakauyon ka sa iyang gibuhat. Angay nga sumpuon nang mga lalake nga ingon ana kay makaguba na sa among bad record sa mga lalake (joke). Bitaw ayaw padala. Kaya ra na nimo. Daghang salamat.

PAPA JOE

(sa inyong tampo ipadala sa papajoelon@hotmail.ph o joelonrt @hotmail.com)