Sugilanon: Ang tikasan

Henry Y. Mañus
Basak-Iba, Lapu-Lapu City

MIKUROG ang kaunoran ni Ricky sa tumang kalagot. Nangumo siya ug mikagot ang iyang bag-ang. Giwakli niya ang mga kamot ni Susan nga iyang asawa, kinsa buot nga mohawid kaniya. Nagpanikad ang iyang mga tiil kay gusto nang mogawas sa ilang balay aron iyang patilawon si Eddie sa iyang kumo. Gisulong siya ni Eddie karon tungod sa kalagot niini nga napildi niya sa sugal nga tsikitsa.

“Gawas diha sa imong lungag ug harunga ko!” nangiukgiok sa tibuok dapit ang singgit ni Eddie nga nagbarog sa gawas sa balay nilang Ricky. May dala kining sundang nga migilak ang suwab sa kahait. “Tikasan kaaa!”

Dako ang pilde ni Eddie sa sugal nga tsikitsa – usa ka matang sa sugal ginamit ang baraha. Gisuwerte man si Ricky ning adlawa maong nakadaog. Wala siya manikas. Nagduda lang si Eddie nga nanikas si Ricky, kay halos napupho man ni Ricky ang tanan nilang pusta. Apan luyo niining tanan nasayod si Ricky nga may tikas siyang nahimo, apan dili sa sugal. Ug tungod sa pagpugong ni Susan kaniya, wala na lang siya makigharong kang Eddie.

Tungod sa maong hitabo wala na gayud moapil pa si Ricky sa sugal. Bisan giunsa siyag agni nilang Robert, Juros ug Nelson kinsa maoy kanunay niyang ikauban sa tsikitsa, wala na gayud siya magpatental.

Usa ka gabii niana nga hayag ang bulan, nagkita na sab sila si Ricky ug si Arlyn nga asawa ni Eddie. Didto sa ilawom sa dakong kahoy nga akasya nga maoy ilang abutanan, bug-os nilang gidimdim ang katam-is sa dugos sa himaya. Mingaw ang maong dapit ug halayo kini sa mga kabalayan. Nahimutang kini sa bungtod nga nag-umbaw sa halapad nga kaumahan. Uyab ni Ricky si Arlyn kaniadto sa ulitawo pa siya, apan wala sila magkadayon tungod kay nimabdos ang lain niyang uyab nga si Susan ug napugos siya sa pagpakasal niini. Human sa pipila ka bulan sukad makasal sila si Ricky ug Susan, gipakaslan pod ni Arlyn si Eddie nga karibal ni Ricky sa iyang gugma. Luyo sa kasayuran sa tanan nilang mga silingan, gidugtong nilang Ricky ug Arlyn ang kanhing nabugto nilang relasyon.

“Mga salbahis! Mga maluibon!” singgaak sa usa ka tawo nga maoy nakabalda sa mainit nga panagromansa nilang Ricky ug Arlyn. Diha-diha nagkabulag ang nagdikit na nilang mga lawas.

“P-Pasayloa ko, B-Bay E-Eddie!” ni Ricky nga nagkanguhal ug nagkurog dihang naaninaw ang dagway sa tawo nga naigo sa kahayag sa bulan. Mihana siyag dagan, apan ulahi na dihang mitaop ang mahait nga sundang diha sa hubo niyang lawas. Natumba dayon siya sa yuta.

“Abi nakog sa baraha ka lang manikas, animala ka!” singka ni Eddie dayong tigbas kang Ricky sa sundang nga maoy nakapaawop sa panan-aw ni Ricky.

Si Arlyn nakadagan nga nagtapis sa iyang sinina. Nagpakitabang sa mga tawo nga iyang nasugatan nga naglakip sa duha ka barangay tanod nga nag-robing. Gidala ni Arlyn ang mga tanod ngadto sa dakong akasya. Didto nagtindog gihapon si Eddie nga nagbitbit sa nagkadugong sundang.

“Eddie, buhii kanang sundang ug kuyog kanamo nga malinawon,” mando sa usa ka tanod.

Gibuhian ni Eddie ang sundang sa yuta ug mipataas sa iyang mga kamot. Ang ikaduhang tanod miduol aron pagpusas kaniya. (KATAPUSAN)