Kon ikaw pahukmon: Katapusang party

MGA alas 2 sa hapon niadtong Mayo 2, 2001, nitambong og birthday party si Gerry. Nianang mga alas 7 sa gabii, nibiya siya sa party uban kang Dadi ug kapuyo ini nga si Wena.

Samtang sila nanaglakaw, nikalit lang pagtunga sila si Tacio ug Rene diha sa ilang atubangan. Gipusil ni Tacio si Dadi ubos sa liog. Gibitad ni Gerry si Dadi padung ngadto sa kanal sa walang bahin sa dan, apan giusban kini pagpusil nila ni Tacio ug Rene.

Dihang nahagba si Dadi, nikaratil pagdagan si Gerry padung sa iyang balay tungod sa tumang kahadlok. Nianang gabhiona gikuha siya sa mga pulis aron kuhaan sa iyang pamahayag.

Si Danny, usa ka pulis, nakadawat og taho kalabot sa pagpamusil. Dali siyang niresponde sa nahitaboan. Iyang naabtan si Wena nga naghilak nga nag-apong sa lawas ni Dadi. Nisulti si Wena kaniya kinsa ang nagpatay sa iyang kapuyo. Iya ning gipangita ug naabtan sa iyang balay.Gidakop niya si Tacio.

Si Elvie, asawa ni Tacio, niingon nga mga alas 7 sa gabii, siya ug ang iyang bana ingon man ang ilang anak nga babaye nanihapon sa ilang balay dihang nakadungog sila og buto sa armas de fuego.

Niadto sila sa karsada nga mga 10 metros ang gilay-on gikan sa ilang balay. Iyang nakit-an si Gerry nga mikaratil sa pagdagan samtang sa pikas bahin sa karsada nagbuy-od ang lawas ni Dadi nga giapongan ni Rowena.

Gisuwayan nila pag-alsa ang lawas ni Dadi ug isakay unta nila sa traysikol, nibalibad ang drayber. Dihang nibalik si Gerry, ila kining gitudlo nga mao ang namusil. Si Elvie niingon nga ang iyang bana maoy gitudlo ni Gerry kay duna kini kasuko kanila.

Managsama og pamahayag sila si Elvie ug Tacio. Si Tacio niasoy nga nanihapon sila sa iyang asawa ug anak nga babaye dihang nakadungog sila og buto sa armas de fuego. Dali silang nigawas sa ilang balay aron pagsusi.

Didto ilang nakit-an si Rowena nga nagbarog samtang si Dadi nagbuy-od. Nakit-an usab nila si Gerry nga mikaratil pagdagan. Matod niya nga wa na siya maka-report sa kapulisan kay gidakop na man siya.

Karon, kinsa man ang nagsulti sa tinuod, ang magtiayong Elvie ug Tacio, o sila si Rowena ug Gerry? Sad-an ba si Tacio sa kasong pagpatay nga gipasaka batok kaniya?