Martin: Reunion, The Mistress, ZsaZsa…

AC Martin
Tagming

Nakakita na ko sa “Reunion.” Grabe ka star-studded sa maong pelikula kay maorag hapit tanang artista sa ABS-CBN dunay cameo role.

Kon fan ka sa Eraserheads, siguradong maka-relate ka sa ilang music kay hapit kada scene duna gyuy background music, kundi man gani sa Eraserheads, sa mga kanta sa Callalily ug uban pang Pinoy bands.

Maayo moda ang mga bidang lalaki, labi na nilang Enrique Gil, Xian Lim, Kean Cipriano ug Enchong Dee. Pero ang mga babaye maorag nagmika, labi na si Jessy Mendiola, Julia Montes ug Megan Young. Hilawan ko sa ilang acting. Si Bangs Garcia ug Cristine Reyes wa sad pa-cute-cute lang.

Si Matt Evans unta to nga nagbinayot apan wa sad gihapon ni katabang. Basin tingali tungod sa estorya nga gawas nga predictable, sobraan ra ka-OA. Mas nindot pa tong Jologs.

THE MISTRESS

Ang The Mistress ang sunod nga pelikula sa Star Cinema.

Nag-lips-to-lips man gyud kuno dinhi si Bea Alonzo ug Ronaldo Valdez. Si Bea nidulang kabit ni Ronaldo samtang si Jon Lloyd Cruz naibog sad ni Bea.

Kon wa ko masayup, Rated R ni o basig ipaubos ni sa R-13.

Nahug ning accidental reunion movie ni Bea ug John Lloyd Cruz. Accidental kay si Derek Ramsay man gyud ang orihinal nga leading man ni Bea, unya kay nibalhin lagi sa TV5, maong gitsugi si Derek sa maong lilas.

Atong atngan ang The Mistress nga showing na karong Sept. 12.

WAY NAKAIMBENTO

Sa ka-advance sa atong teknolohiya apan hangtod karon wa pa gyuy naka-imbento unsay tambal sa cancer o bisan sa AIDS.

Bisan gani ang nailang computer genius ug visionary nga si Steve Jobs wa kakitag tambal sa iyang sakit nga cancer nga maoy iyang napildihan niadtong Oktubre.

Maayo na lang ni kang ZsaZsa karon kay nadiskitahan dayon. Naa pay laing nag-antos sa sakit sa kidney mao ang kanhi sikat nga singer niadtong 70s nga si Susan Fuentes, ang nagkanta sa Usahay ug Miss Kita Kung Christmas.

Sigon sa atong source nga nagdiliryo na kuno ni ug sigeg pangayo og pasaylo sa iyang mga anak nga giingong katapusan niyang nakita niadto pang 2001. Atong ipanalangin ang ilang kaayohan. Hinaot magsilbi ning pahinumdom nato nga usahay duna gyuy mga pagsulay aron motugkad ta pagbalik sa yuta ug aron makahinumdon ta sa kabililhon sa kinabuhi nga duna gyu’y utlanan ang tanan.