Sugilanon: Hain si Miraluna?

Carmelo D. Lariosa
Panadtaran, San Fernando, Cebu

MITAN-AW si Ric sa hulagway sa usa ka matahom nga babaye nga diha sa kuwadro ibabaw sa piyano. Gitutokan niya kini ug milugmaw ang iyang mga luha.

“Hain ka na man karon, Miraluna? Nganong kalit kang mibiya dinhi sa atong pinuy-anan nga wa lang gani magbilin og bisan gamay na lang sulat nga ikaw wa nay gusto kanako?” Kining mga pangutana didto lang molanog sulod sa kahiladman ni Ric.

Si Miraluna, iyang kapikas, kalit lang mibiya kaniya sama sa usa ka tigmo, sama sa usa ka damgo. Sayod siya nga gimahal usab siya ni Miraluna kay may handumanan kining gibilin kaniya – usa ka kinulit nga kasingkasing nga kahoy diin sa nawong niini diha ang duha nila ka pangalan: Rico ug Miraluna. Gitutokan niya ang kinulit nga kasingkasing.

“Dili na lang nimo pangitaon ang imong asawa, Rico?” hinay ang tingog ni Mama Salud niya, kinsa mibati usab og kabalaka ning nahitabo kaniya.

“Asa ko man siya, Ma?” maguwang lang sa hagawhaw ang tingog ni Rico. Subo ang iyang panagway.

“Wa ka bay nasayran nga mga dapit nga adto siya mopaingon?” ni Mama Salud nga gibati og kaguol.

“Wala, Ma. Pero suwayan lang nako ang pagpangita kaniya bisan asa.”

“Ayaw lang god kaguol pag-ayo, Rico. Imo ra kadto siyang madumdoman kon hain siya karon.”

“Wala man unta mi mag-away, Ma.”

“Apan nganong mipahilayo man siya?”

BUGNAW ang huros sa hangin ning orasa karon dinhi sa karaan ug gubaong simbahan sa Mirador, ang balangay diin una niyang gikahibalag si Miraluna. Ang simbahan salin sa gubat panahon sa mga Hapon. Nindot kining dapita ug gihimong ‘tourist spot’ sa Mirador.

Gibati karon ni Rico nga daw kagahapon lang ang panaghimamat nila ni Miraluna. Misulod siya sa simbahan ug miluhod atubangan sa altar. Dala niya ang kinulit nga kasingkasing nga kahoy. Gihagawhaw niya ang mga pulong nga gilitok nila ni Miraluna kaniadto, “Matapos man ang kalibutan, apan ang atong gugma magpabilin sama ning karaang simbahan nga nakaangkon og dagmal sa nanglabayng panahon. Apan kon usa kanato wa nay pagbati o gugma sa usag-usa, mobalik ta dinhi aron dauban ang mga handumanan, sama ning atong gikuptan nga kasingkasing.”

Namupho og mga layang dahon si Rico ug gikuot ang pusporo gikan sa iyang bulsa. Apan kalit may miabot. Usa ka babaye, nagkalago ang sinina, kalkag ang buhok ug hugaw ang nawong. Miluhod kini tungod sa altar ug dayon miduol sa nahimutangan sa kinulit nga kasingkasing. Gikalit pagpunit ang kasingkasing ug midagan. Nakaila siya sa babaye. Si Miraluna nga karon nagdagan paingon sa lawom nga bung-aw diin may titip nga agianan.

“Miralunaaaaa!” misinggit si Rico. “Nganong naingon ka man niini, ha? Huwata kooo! Ayaw pagdangan paingon sa bung-aw!”

Apan ulahi na. Wala na hiabti ni Rico si Miraluna kay kalit nga milayat kini sa bung-aw.nga nagkupot sa kahoy nga kasingkasing. Diha sa tampi mihilak si Rico nga wala makasabot sa iyang asawa nga nalisuan sa pangisip.

Taudtaod dihay taga Mental Hospital nga nangabot aron pagdakop kang Miraluna aron ibalik didto sa tambalanan. Apan wala na, wala nay kinabuhi si Miraluna didto sa ubos sa bung-aw. Unya may taligsik nga misugod pagpangatagak, pasiuna sa ulan nga umaabot. (KATAPUSAN)