Sugilanon: Dukot

Don K. Depariene
Cebu City

MITIMBAKUWAS si Dino gikan sa katre nga gihigdaan. Human sa usa ka semanang gitakbuyan sa nagbalik-balik nga hilanat gumikan sa iyang ulser ug sa pagtumar og tambal, nabatyagan niya nga inanay nang mibalik ang kalagsik sa iyang lawas. Wala na kaayo mosuol ang kangutngot sa iyang ulser nga maoy linugdangan sa pasar-pasar sa kaon matag adlaw.

Hinay ang mga lakang ni Dino nga mipai­ngon sa kusina. Wala pa siya makalungag sa iyang pamahaw. Mihilab ang kagutom sa iyang tiyan. Giukban niya ang kaldering lung-aganan nga diha sa abuhan. May dukot sa kan-on nga nagpilit sa lubot sa kalderin.

Mikuha siyag kutsara ug gikudkod ang dukot.

“Bahala nag dukot basta matambalan lang ang akong kagutom. Naghilab na akong tiyan ug apiki na nga mopalit pa kog pagkaon sa gawas. Payts na ning dukot!” mikibutkibot ang baba ni Dino. Nagpanglingo siya sa nasinati niyang kalisod bisan kon wala pa siya takbuyi sa balik-balik nga hilanat gumikan sa iyang ulser. Usa lang siya ka kargador sa pantalan nga maoy iyang gipanginabuhian.

“Nganong midukot man gyud ka sa pagpangarga sa piyer, Din? Di na makabuhig pamilya.

Way babaye nga mosugot nimo kon magpabilin kang kargador hangtod sa hangtod?” misantop karon sa kaisipan ni Dino ang gisulti kaniya ni Making, kanhi kauban niyang kargador sa piyer, nga paspas kaayo ang pag-asenso sa ilang dapit sa eskuwater.

Hinuon, sakto sad ang gisulti ni Making kaniya. Sa edad karon nga 30 nagpabiling ulitawo si Dino nga nagpuyong nag-inusara sa iyang barungbarong. Maulaw siyang mangulitawo og babaye tungod kay way klaro ang iyang kinitaan sa pagpangarga.

“Dawata ang gitanyag kong trabaho nimo, Din, aron makatilaw kas kaharuhay sa kina­buhi. Ayawg dukot sa imong pagka kargador. Suwayi ang trabaho nga akong gitanyag kanimo aron moasenso ka. Adtoa kos akong balay kon mosanong ka na niini.”

“Gikasubo ko, Mak. Bahala nag maghamoy kos akong tudlo, apan di ko makaya nga mahimong drug pusher sa menudong shabu dinhi sa siyudad!”

“Aw, kon modukot gyud kas imong pagka kargador sa piyer, Din, wa gyud kay asenso!” ni Making nga mibiya dayon kang Dino.

Natambalan ang kagutom ni Dino ning buntaga human makakaon sa dukot ug human makainom og usa ka basong tubig. Nabatyagan niya nga milagsik na siya ug andam nang mobalik pagpangarga sa pantalan. Paghigawas niya sa natad sa barungbarong, nadapit iyang pagtagad sa nagganayan nga mga tawo sa eskuwater. Nakugang siya sa gibalita sa iyang mga silingan.

“Nadakpan si Making sa taga PDEA! Dag­hang menudong shabu ang nasakmit gikan kaniya!”

“Way piyansa nga gitugot kang Making. Magtingkagol siya sa prisuhan isip notadong drug pusher nga tigpayuhot og menudong shabu sa tibuok siyudad!”

Nakahangad si Dino sa kahitas-an.

“Salamat, Ginuo, nga wa gyud ko matental sa tanyag kanako ni Making!” nakatuaw si Dino. Ug misamot ang iyang gibating kalagsik sa iyang lawas samtang naglakaw padulong sa pantalan. (KATAPUSAN)