Talk to Papa Joe: Nangita sa amahan

DEAR Papa Joe,

Tagoa lang ko sa ngalan nga Amir, half Bombay, 22, ug kasamtangan nga nagpuyo diri sa Manila. Taga Bohol ko pero ning bag-ohay lang niari ko sa Manila tungod sa rason nga makit-an nako akong amahan.

Sukad nag bata ko wala ko makabatyag nga importante ko sa akong pamilyang nadak-an.

Ang akong mama di ganahan nako ug naa na sad siyay pamilya. Ilado ko sa among dapit tungod sa lahi nakong panagway kay matod pa sa istorya napaangkan akong mama og usa ka “Turko” nga tigpautang sa among dapit. Pila ra may sugilanon, naninguha ko nga makaanhi sa Manila para makita nako ang akong amahan kay matod pa sa Turko nga akong nakaila, basin og nakaila siya sa akong amahan maong iya kong giimbitar nga moari kay naa kuno siyay kaila nga murag kaila sa akong papa.

Pero paet huna-hunaon nga nag tuig na lang ko diri, way amahan nga nakita. Hinuon naa koy trabaho diri. Arang-arang dyutay kay sa Bohol nga mananagat ra ko. Pero diri houseboy ko. Okay ra man unta ang sweldo pero gimingaw ko sa akong pamilya sa Bohol labi nga walay amahan nga akong nakita.

Usa pa diay wala sad makaila akong mama sa akong papa kay wala lagi tawon say grado.

Dili malitok Mama ang ngalan hangtod nga nalimtan niya. Karon mangayo ta ko og tambag kon mouli na lang ba ko o magpabilin dinhi?

AMIR

Amir,

Dong, sorry nga nahiagum ka anang sitwasyuna no. Pero samtang nagginhawa pa ang tawo, dako ka pa og kaugmaon nga masugatan. Ako pa nimo, naa na man ka sa saktong edad, mas maayo nga pangitaon nimo ang imong ugma diha. Tinuod gimingaw ka sa pamilya nimo pero ikaw ra may gasulti nga murag di ka importante didto. So, mas maayo diha na lang ka basin og moasenso ka diha.

Ayaw lang sad dali dali-a pagpangita ang imong amahan kay daghan bayang mga Turko nga niari sa ato ug namalik na sa India. Tinuod nangita ka siguro og gugma sa amahan pero naay mga panghitabo nga sa ngadto ngadto, maaninaw na nimo ang purpose nganong ingon ana ang sitwasyon.

Matod pa sa ginaingon nga “ang mag-antos masantos.” Pag-ampo nga matubag na ang imong mga pangutana sa imong kinabuhi. Daghang salamat.

PAPA JOE

(sa inyong tampo ipadala lang sa papajoelon@hotmail.ph o joelonrt@hotmail.com)