Serna: Jay-R Siaboc, Halad sa Kabataan, Amorosa

SUNOD-SUNOD gyud ang mga pista karong panahona. May pista alang kang San Roque, San Agustin, Sta. Rosa de Lima.

Syempre, ang barangay San Roque sa Talisay City apil niining mga magsaulog. Lakip sa mga kalihukan mao ang pasundayag sa kanhi 1st runner-up sa unang Pinoy Dream Academy nga si Jay-R Siaboc ugma gyud mismo, Sept. 1. Anha kini pagahimoon sa San Roque basketball court.

Ang moabli sa pasundayag mao ang bag-o lang gikuptan sa Jun Esma Talents & Events Management nga Icewave Band. Lakip sa mopakita sa abilidad mao ang inilog nga Upgrade Band nga rock ‘n roll ang tirada ug kang kansang lead vocalist nga si Tope Mendres ig-agaw ra sab ni Jay-R.

Mo-front act usab ang QCS11 Band nga R&B usab ang mga tokar ug gipangulohan sa abilidarang drummer nga si Glenn Navarro. Ang bokalista sa Extremes Band nga si Tyler Esbra Baculao mosalida sab. Mga sakop kini sila sa Jun Esma Talents & Events Mgt.
Magsugod ang Jay-R Siaboc Live in Concert sa alas 8 s.g. Kitakits.

***

Bisag pustaan pa, duna nay mopatokar og awit sa pasko sugod ugma. Kana tungod kay unang adlaw na sa Septyembre ug magsugod na ang gitawag nga kinatas-ang pasko sa kalibutan nga sa Pilipinas ra mahitabo. Moki-at na sab ang mga mananaygonay ani. Pag-andam nag sinsiyo.

***

Morag maayo kuno ang dagan sa pag-apil sa pelikulang Thy Womb nga gibidahan sa nag-inusarang superstar sa nasud nga si Nora Aunor didto sa film festival sa Venice.

Mora kunog mosunod kini sa ubang mga pelikulang gidirihir ni Brillante Mendoza sama sa Serbis, Kinatay ug uban pa nga nakadawat og mga pasidungog sa mga international
festival nga naapilan.

Kon mahitabo, lain na usab kining dungog sa nasud ug sa mga artistang Pinoy.

***

Dinhi niadtong miaging semana ang mga artistang Kapuso nga nagbida sa bag-o lang gisalida nga Just One Summer nga sila si Julie Anne San Jose ug Elmo Magalona. Di lang kay kabahin sa maong pelikula ang ilang pagbisita sa Cebu, nibisita pa gyud sila sa barangay Opao, Mandaue City alang sa Barangayan ug sa paglingaw sa mga taga Opao tungod sa imbitasyon ni Madam Linda Ouano.

Panaad na kuno ni Ma’am Linda nga mag-imbitar og mga artista kada pista aron magpasundayag sa ilang barangay.

***

Mibisita usab diay sa Cebu ang Kapamilya nga si Martin del Rosario kay nag-promote sa pelikulang medyo kuyaw nga nag-ulohan og Amorosa: The Revenge. Apil si Martin sa bag-o lang sab nga gisalidang The Healing ug nabantayan nga maayo kini moarte.

Pero lahi sa The Healing, medyo kalmado ra kuno ang iyang dinad-an dinhi kay papel sa usa ka buta ang iyang gidala. Atong tan-awon unsay tirada ni Martin dinhi.

***

Nagsugod na ang district eliminations sa natad sa pagkanta ug duweto ginamit ang gitara kagahapon didto sa Carcar City. Duha kini ka mga bangga kalabot sa proyektong Halad sa Kabataan sa Provincial Council for the Welfare of Children.

Ang ikatulong bangga mao ang sa mga rondalya diin ang elimination round pagahimoon usab karong Sept. 15 diin magpili sa tulo ka labing maayo aron mag-showdown unya sa Okt. 13. Atangi.