Kon ikaw pahukmon: Masaker

Si Alan nitambong sa haya sa iyang silingan nga si Cherry, mga alas 11 ngadto sa tungang gabii. Niduwa siya og dama atubangan sa balay uban sa ilang mga silingan. Diha sila si Pastor, Kikoy, Jan, Roj, Jimar, Cris, Carie, Jerry ug Elly.

Samtang sila nanagduwa, nakadungog si Alan og buto sa armas hinungdan nga nikamang siya sa sementong lingkuranan aron pagtago. Human niini, gisundan ang buto og lain pang mga buto. Nidagan siya sulod sa balay aron pa gyud motago.

Nakakita si Alan sa duha ka mga tawo nga armado og armalite rifle nga nagsapot og itom nga ningpunting kanila. Bisan kini nag-bonnet, ang nawong niini wa matabuni. Iya ning nailan nga sila si Nap ug Dito.

Human sa mga buto, nilili siya sa gawas. Nakit-an niyang nagbuy-od na si Kikoy ingon man ang igsuon niining si Pastor. Nidagan si Alan ngadto sa ilang balay. Didto iyang nakit-an nga nagbuy-od sa pultahan si Jerry ug nitabang pagdala sa ospital apan namatay kini.

Wa dayon siya mosulti sa iyang nahibaw-an kay si Nap usa ka pulis samtang si Dito bodyguard sa usa ka mayor. Nilanat pa og duha ka mga buwan una siya nitug-an sa iyang nahibaw-an.

Si Carie nakakita usab diay sa hitabo ug nakaila sa mga akusado. Iya ning nakit-an nga didto niagi sa kahumayan padung sa ilang nahimutangan dayon namusil kanila. Sa iyang pagdagan aron unta motago, naigo siya sa paa ug bukton. Sila si Kikoy ug Pastor nangamatay, ingon man sila si Jerry ug Roj.

Sama sa gihapon wa dayon siya mosulti sa mga pulis sa iyang nahibaw-an tungod sa kahadlok niya sa mga akusado.

Si Nap, sa iyang bahin, niingon nga sa petsa ug oras nga nahitabo ang krimen, didto siya sa kampo nga layo ra sa crime scene alang sa inspection. Human sa inspection, nanakay sila sa jeep sa iyang kauban nga pulis. Sa iyang pag-abot sa ilang lungsod, nakadawat siya og text message gikan sa iyang igsuon nga dunay masaker nga nahitabo sa ilang dapit.

Iyang gihuwat ang ambulansya nga moagi sa ilang dapit, apan gisultihan siya sa iyang mga silingan nga niagi na kini. Niapas siya sa ospital ug didto iyang nakit-an sila si Alan ug Carie nga nangasamdan ug gipangtambalan.

Iyang gipangutana sila si Alan ug Carie kon nakaila ba sila sa mga mamumuno, apan ninbalibad kini tungod kay ngitngit atol sa hitabo. Niangkon siyang kaila sila ni Dito kay nanarbaho kini sa munisipyo.

Si Julie niangkon nga didto siya sa gawas nanghatag og kape dihang nahitabo ang pagpamusil. Samtang nagbuto-buto, wa gyud siya makakita sa mga gunman tungod kay ngitngit. Sa ospital, iyang nakit-an si Nap nga nakig-estorya kanila ni Alan ug Carie labot sa hitabo.

Niasoy usab si Berto, saksi sa depensa, nga kuyog sila ni Nap gikan sa kampo apan nagbuwag sila dihang nikanaog kini sa sakyanan mga alas 11:45 sa gabii. Wa na sila magkita sa pagkahuman.

Duha lang ang mga saksi sa prosekusyon. Mas daghan ang sa depensa. Kon ikaw ang
pahukmon, hain man ang mas bug-at? Sad-an ba ang mga akusado sa pagpatay sa upat ka mga biktima ug sa pagkaangol sa laing duha?