Balak: Sama sa Sampaguita

Maximillian D. LLaban
Gun-ob, Timpolok, Lapu-Lapu City

Sa kinauyokang dapit sa akong kasingkasing
gipakabathala ko ang gitisok mong gugma.

ug kini molipang pa sama sa gitanom
kong sampaguita nga nangalimyon
sa kahanginan.

Tungod sa kadaghan sa nangandoy kanimo
ako ang nag-inusarang gitugahan mo
sa hamiling pagmahal.

Daw nakita ko sa ilang mga tinutokan
ang kahinugon ug pag-alindasay.

Daw nakita ko sa ilang mga mata
ang kasina ug pagpaminti.

Daw nakita ko usab ang ilang
nagtulisok nga yam-id.

Daw nakadaog ako og binakat
nga katigayunang dili mahurot
inigligid sa mga adlaw.

Malipayon ako, milupaypay
kining kasingkasing,
mibathay.ang pagbati ning dughan
mapasigarbuhon ug puno sa kamaya,
kay atubangan sa daghang mga tawo
mga pakpak ilang gidalit kanako.

Sayod akong magdugay pa kining
giamumahan tang gugma.

ug sa pagbuliskad sa mga bulak niini
laumi nga ikuwentas ko matag adlaw
sa akong pagpanikaysikay alang
sa atong ugma.

Bisbisan ko sa matag higayon
aron ang atong pagminahalay
molanat ug manalingsing
hangtod sa kahangturan.