Sugilanon: Trahedya sa kasal

-A A +A

Sunday, July 14, 2013


Gally T. Sayson
Nivel Hills, Busay, Cebu City

“DILI ko gusto nga si Adonis ang imong mabana!” masuk-anon nga namulong si Rumolo ngadto sa iyang anak nga si Edna.

“Unsa may hinungdan, Tay, nga supak ka man sa among panaghigugmaay ni Adonis?”

“Kaaway kong mortal ang iyang amahan nga si Gally!”

“Nganong imo mang iapil si Adonis sa away ninyo sa iyang amahan?”

“Basta, wala akoy gusto nga mahisagol sila sa atong pamilya! Nakasabot ka?”

Walay nahimo si Edna sa gusto sa iyang amahan. Wala madugay gibaligya ni Rumolo ang iyang balay ug milalin ngadto sa Min­danaw. Walay adres nga gibilin sa mga sili­ngan, bisan sa iyang mga paryente. Sa pagduaw ni Adonis kang Edna wala na sila diha, ug lain na ang nagpuyo sa balay nilang Edna.

“Wala ba mo masayod kon diin sila balhin?” sukna ni Adonis sa usa ka silingan.
“Wala gyud, Dong,” maoy tubag.

Nahadiin-diin pagpangita si Adonis nilang Edna, apan walay bisan usa nga nasayod diin balhin ang pamilya sa iyang hinigugma.

Milabay ang napulo ka tuig, didto sa Mindanaw namatay sa aksidente ang magtiayong Rumolo ug Rosa. Kini gikaguol og maayo ni Edna nga gawas nga masakiton, nag-antos pa sa kalisod sa panginabuhi. Wala kini magminyo tungod sa kapakyas sa ilang gugma ni Adonis.

Sa laing bahin usa na ka manedyer sa usa ka banko si Adonis. Didto siya idestino sa bag-ong branch sa Mindanaw.

Usa ka higayon, dunay house and lot nga giprenda sa banko nga gidumala ni Adonis.

Dihang nakita ni Adonis ang titulo sa yuta nga gipanag-iya ni Edna Lagrimas, iya dayon kining giadto aron susihon. Iyang nakit-an ang iyang hinigugma nga dugay na niyang gipangita. Masakiton kini ug niwang kaayo.

“Edna, salamat sa Ginuo nga nakit-an ko ra gihapon ikaw!”

“Adonis, ikaw ba?”

“Oo, mahal ko,” ni Adonis nga misapupo kang Edna. “Magpakasal ta sa labing daling panahon. Atong bawion ang nausik nga napulo ka tuig sa atong kinabuhi.”

“Wala na kitay panahon niana, Adonis.”

“Nganong wala?”

“Masakiton ako, Adonis. Hapit na ang kinutoban sa akong kinabuhi.”

“Dili kana tinuod, mahal kong Edna, apan bisan pa niana, buhion ka sa akong pagmahal ug paghigugma. Salig lang sa atong Ginuo kay buhion ka Niya alang kanako.”

Luyo niining tanan, bisan pila na lang ka adlaw ang nahabilin sa iyang kinabuhi, walay kasudlan ang kalipay ni Edna, kay sa katapusan, iya gihapon nga gikahinagbo ang mahal niyang si Adonis. Misugot siya nga magpakasal kang Adonis.

Paglabay sa usa ka semana nagpakasal ang duha ka binuhat nga sa napulo ka tuig nagkalinay-anay.

Samtang mipaso sila paingon sa altar nadunggan nila kining maong awit sa choir,
“Oh promise me that someday you and I will take our love together to some sky.”

Igo lang natapos ang kasal, natumba si Edna ug nabugtoan sa gininhawa, samtang nagpadayon pag-awit ang choir sa “Oh Promise Me.” (KATAPUSAN)

Gipatik sa mantalaang SuperBalita Cebu Hulyo 15, 2013.

Kalingawan

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!

Today's front page

Sun.Star SuperBalita Cebu front page for August 31, 2014
Sun.Star Jobs
  • Calamity Report
  • tell it to sunstar
  • Philippine Polls
  • Filipino Abroad
  • Sun.Star Zup!
  • Sinulog
  • Obituary
  • goodearth
  • Pacman blog
  • Habemus Papam
  • Pnoy
  • SunStar Celebrity
  • Technology
  • Sunstar Multimedia
  • ePaper
  • Festivals