“LAGOON within the city”
Kini mao ang paghulagway sa Cebu Westown Lagoon ang bag-ong waterpark nga anaa sa MO2 entertainment complex nga nahimutang luyo sa MO2 bar sa Subangdaku sa dakbayan sa Mandaue.
Niadtong Agusto 25 ning tuiga, pormal nga gibuksan ang lagoon ug ang entertainment hotel niini isip ikaupat nga entertainment complex sa MO2 sa Visayas.
Ang supervisor sa Cebu Westown Lagoon nga si Rusyl Ciubal dihang nahinabi sa Sun.Star Superbalita nagkanayon nga ang tag-iya sa lagoon usa ka Ilonggo ug anaa kini branch didto sa Iloilo, Bacolod ug Coron, Palawan.
Anaay duha ka pool ang lagoon, usa alang sa mga bata ug usa alang sa mga dagko apan hangtod upat ka tiil lang ang gilawmon niini.
Anaa usab kini duha ka init nga jacuzzi, duha ka slides nga anaay 30 ug 20 ka tiil ang gitas-on, playland alang sa mga bata, function hall, restaurant ug ang hotel rooms niini.
Mamahimo ka nga mogamit sa ilang waterpark sa P300 alang sa mga dagko ug P200 alang sa mga bata nga anaay gitas-on nga duha ngadto sa upat ka tiil.
Apan sugod Disyembre 20, magsugod na ang ilang rack rate kon peak season diin P400 na ang bayad sa dagko samtang P300 alang sa mga bata.
Sa matag ticket nga imong paliton isip bayad sa lagoon anaa kini uban nga usa ka libre nga mainom diin magdepende kini sa imong gusto.
Istrikto usab sila sa ilang swimming attire diin di pwede maligo ang usa ka indibidwal kon wa kini swimming attire apan anaa silay paabangan sud sa lagoon.
Wa usab silay corkage sa pagkaon ug ilimnon apan way labot ang makahubog nga ilimnon ug lechon baboy.
Anaa usab silay libre nga common picnic area apan first come, first serve basis kini apan anaa usab silay cottages gikan sa labing barato nga P600 ngadto sa P2,400.
Sa ilang room rates mamahimo kana nga mag-overnight sa labing ubos nga presyo sa P3,800 nga deluxe room ug sa labing mahal nga presyo sa P7,800 sa ilang family room.
Abli ang waterpark sugod alas 8:00 sa buntag hangtod lang sa alas 11:00 sa gabii.
Kon ganahan ka nga mag-relax o maligo og pool nga di layo sa siyudad bisitaha na ang Cebu Westown Lagoon, ang lagoon nga anaa sa siyudad.