LIBOAN ka mga tinun-an sa public high school gikan sa kapin sa 100 ka mga tunghaan ang ning-aubos sa leadership program diin gibansay sila nga mahimo nga maayong lider sa nasod.
Ang mga tinun-an nipaubos sa Servant Leadership Program nga gidesenyo sa Ramon Aboitiz Foundation Inc – Kool Adventure Camp ug gipaabot nga makahimo sila og kausaban sa ilang tunghaan ug komunidad.
Ang programa gitumong sa pagpalambo sa prinsipyo sa pagkaalagad nga lider pinaagi sa adventure program, pag-estabilisar sa komon nga pamatasan ug personal nga kalamboan sa plano alang sa tinun-an nga mahimo nga maayo sa iyang papel ug responsibilidad isip mga lider sa tunghaan ug komunidad.
“The debriefing process after each activity during the program was really helpful because it gave me the opportunity to discover what was wrong and what I must do. It also helped me identify my strengths and improve it even more,” paambit ni Wryppner Wolter Wurbey Timbal, usa sa mga partisipante.
Ang programa nagtudlo sa 10 principles of servant leadership: listening, empathy, healing, awareness, persuasion, conceptualization, foresight, stewardship, commitment to the growth of people, and building a community.
Ang mga tinun-an nga napaubos na sa programa o gikatakda nga mosinati sa programa gikan sa 30 ka mga dakbayan ug kalungsoran sa Sugbo, sama sa Alcoy, Alegria, Aloguinsan, Argao, Asturias, Badian, Balamban, Bantayan, Barili, Boljoon, Camotes, Consolacion, Cordova, Daanbantayan, Dalaguete, Dumanjug, Ginatilan, Madridejos, Malabuyoc, Medellin, Minglanilla, Moalboal, Oslob, Pinamungajan, Ronda, Samboan, Santander, Sibonga, Tuburan, ug San Fernando.
Ang unang 200 kamga tinun-an nga lider nakatapos sa pagbansay niadtong Hunyo ug sa unang semana sa Hulyo, mosunod nga sisyon sa 1,000 ka mga tinun-an motapos sa ilang programa sa mosunod nga lima ka buwan hangtod sa Disyembre ning tuiga. (PR)