KAPIN sa 100 ka mga parokyano sa Sto. Tomas de Villanueva sa Barangay Poblacion Pardo, siyudad sa Sugbo ang nihimo og panaw-duaw sa parokya ni Sto. Tomas de Villanueva sa Barangay Matutinao, lungsod sa Badian niadtong Mayo 19, 2016.
Ang pilgrimage gipanguluhan nila ni Msgr. Raul Go ug Msgr. Agustin “Ting” Ancajas.
Si Joseph Daan, presidente sa Parish Pastoral Council sa STVP sa Badian, mapasalamaton nga ang ilang parokya ang napili sa mga parokyano sa Poblacion Pardo nga maoy duawon ug hatagan og tabang pinansiyal atol sa pagbisita.
Ang ilang parokya natukod niadtong 1962.
Ang STVP sa Barangay Poblacion Pardo nagsaulog karong tuiga sa ika 150 ka tuig nga kasumaran sa pagkahimo nga parokya niadtong Abril 22, 1866.
Si Cebu Archbishop Jose Palma nideklarar sa parokya sa Pob. Pardo nga lugar sa panaw-duaw ug mitugot og espesyal nga tuig sa grasya sa simbahan sud sa usa ka tuig sugod niadtong Abril 13, 2016 hangtod sa Abril 22, 2017.
Usa ka misa ang gihalad sa mga parokyano sa Pardo sa giduaw nga simbahan ug gisunod ang salo-salo sa Kawasan Falls.