SA di pa hingpit matapos ang init nga panahon, usa ka resort sa Villaba, Leyte ang mamahimong bisitahon aron mag-relax.
Ang SyBreeze Resort nga iya ni Villaba, Leyte Vice Mayor-elect Dennis Sy ang gidayo karon sa daghang mga turista.
Naa kini mahimutang sa Barangay Hinabuyan, mga duha ka kilometros gikan sa town proper.
Maadto nimo ang pinaagi sa pagsakay og traysikol gikan sa town proper, ang mga traysikol naa magturno sa merkado ug park diin P15 ang plite niini.
Way problema kay sementado ang karsada paingon sa resort.
Inig sud nimo sugaton ka sa mga kahoy nga gihimong taytayan paingon sa mga cottage.
Gawas nga ma-exercise ang imong kalawasan gumikan kay magbaktas ka paingon sa cottages.
Malingaw usab ka mag tan-aw sa mga langgam nga manugpa sa mga pagatpat nga nagpalibot sa imong agianan.
Gibuksan ang resort sa publiko niadtong tuig 2015.
“Usa ra gyod ni ka cottage sa una, sa pamilya lang namo. Pero daghan sa among bisita ang mitambag nga pun-an ang mga cottage,” matod ni Sy.
Duna nay walo ka cottage ang resort, comfort rooms diin haom kini kun dunay ipahigayon nga reunion, family day o ba kaha para sa magbarkada.
Ang rate sa cottage, dunay P150, P300 ug P500 depende kini sa gidak-on, pwede magsugba kay duna na kini dala nga sugbaan matag cottage.
Ang management nagbutang usab og basurahan matag cottage aron di ilabay og diretso sa dagat ang basura.
“Istrikto sab ta sa cleanliness sa resort kay di sab maayo kitaon sa mga turista kung hugaw ang palibot,” dugang ni Sy.
Kun plano ninyo nga mobisita sa resort mas maayo nga magdala kamo sa inyong mga gikinahanglan ilabi na ang tubig mainom kay medyo distansya ang tindahan sa resort.
Matod ni Sy nga pwede ra usab mag-overnight ug di kabalak-an kay dunay daghang suga ang matag cottage.
Ang matag cottage dunay hagdanan ug boardwalk panaog sa dagat.
“Safe sab ni sa mga bata kay pwede raman maglingkodlingkod sa boardwalk while naghumol siya sa tubig pero bantayan lang gihapon,” matod ni Sy.
Alang sa pipila ka mga turista nga nahinabi sa Superbalita Cebu nga mas nindot kaligoan inig kada sayo sa buntag ug inig ka hapon.
Daw mawala sab ang imong gihambin nga balatian ug problema gumikan sa presko kaayong hangin ug maaninaw nimo ang berdeng kalikupan nga nagpalibot sa resort hilabi na kung ‘sunset’.
“Mora bag mawa ang imong problema unya layo ka sa kagubot kun naa ka diri,” matod ni Nenita usa sa mga mibisita sa resort.
Nagplano karon si Sy nga palambuon pa ang mga tourist destination sa lungsod sa Villaba, Leyte ilabi kay siya ang napili nga bise mayor ug mayorya sa konsehale iyang kaalyado.