Serna: Jodi gikuyawan makatrabaho ubos ni direk Erik Matti

O, unsa na? Nakapanukad o nakasugod na mo pag-ugmad sa atong gidamgong kausaban o “change”? Di ra man god si Presidente Rodrigo ‘Digong’ Duterte ang atong saligan aron makab-ot ang maong damgo.

Gikinahanglan ang pagtambayayong sa tanan, ma-opisyal man sa gobyerno o yanong lumulupyo. Kon apil ta sa nagdamgo niining maong kausaban, way rason nga mangiyugpos ug maghinan-aw lang kita samtang ang uban nagkadusingot sa pagpaningkamot aron makab-ot ang maong damgo.

***

Lingaw kaayo ang gipahigayon nga press conference alang sa The Achy Breaky Hearts nga gitambongan sa mga bida nga sila si Jodi Sta. Maria, Ian Veneracion ug Richard Yap uban ang Cebu Entertainment Media Group (E-Group) didto sa Radisson Blu niadtong Lunes.

Ang JSP Ads & Promotions sa promo diva nga si Josie Pereyra ang nagpahigayon sa maong kalihukan kauban sila si Rolito Inzo, Edelyn Escalante-Salvador, Winson Bacalan ug Ma. Angeles Abellaneda.

Daghan na ang nahibalo nga dinhi sa Cebu nagtubo si Richard mao nga nindot siya paminawon kon mag-Binisaya. Sa mall shows, ni-angkon si Ian nga taga Lilo-an ang iyang mama. Sa ato pa, matawag nga taga Cebu pod si Ian.

Kini tingali ug uban pa ang hinungdan nga gidumog ang ilang mga pasundayag.

Sa laing bahin, pormal si Jodi sama sa mga papel nga iyang gidala sa Be Careful With My Heart ug Pangako Sa ‘Yo, diin tagsatagsa niyang gikapares sila si Richard ug Ian.

Gihulagway ni Jodi ang iyang leading men nga “fun, parehong bugoy, makulit, napakabait ug magaan kasama.” Iya usab nga gihatag importansya ang nindot nga script ug maayong direktor nga si Antoinette Jadaone.

Sa laing bahin, may mga umaabot nga mga proyekto ang tulo. Si Ian makita dayon sa dili madugay sa teleseryeng The Second Wife kauban nila ni Bea Alonzo ug Iza Calzado.

Si Richard kauban sa usa ka pelikula alang sa Metro Manila Film Festival karong Disyembre. Wala pa hinoon siyay detalye sa maong proyekto kay igo pa lang kining gihisgutan sa usa nila ka tigom.

May proyekto usab si Jodi para sa MMFF diin ang inilang direktor nga si Erik Matti maoy mogaling niini. Matud ni Jodi nga bisan wala pa sila makasugod pagsyut, gikuyawan na siya kay sa ilang panagkita ni direk Erik giingnan siya nga ‘I really demand a lot from my actors!’

Igo ra kuno siyang nakatubag og “Ha?” Hehe! Ana lang!

***

Seguradong malingaw gyud ang mga natawo na sa panahon sa kabantog sa grupong The Beatles niadtong dekada 60. Kini tungod kay ang grupong Bootleg Beatles magpasundayag karong Hulyo 16 sa Waterfront Cebu City Hotel & Casino.

Nasayod na man ta nga daghan ang mga kantang gipasikat sa The Beatles ug gani motumaw man kini sa mga videoke-han ug bisan sa sulod sa lainlaing mga pagsaulog.

Bisan kon wa pa mo matawo niadtong panahon sa The Beatles pero carry ra gihapon ninyo ang mga kanta sa grupo, unsay maayo kon magkitakita ta didto?

***

Kon hilig mong mag-malling, motan-aw sa telebisyon, maminaw sa radyo o mobasa og mantalaan (labinag Super Balita, yehey!), seguradong nahibalo mong niduaw sa Cebu sila si Alden Richards ug Maine Mendoza o AlDub mga duha na ka semana na ang nakalabay.

Kini tungod kay ilang gipagarpar ang ilang pelikulang Imagine You and Me, nga maoy ilang dalit pinaagi sa GMA Films ug APT Entertainment ngadto sa ilang mga magdadayeg atol sa unang anibersaryo sa ilang panagpares isip AlDub.

Didto sa Italya ug pila ka dapit sa nasud gisyut ang maong pelikula. Isalida ang Imagine You and Me sugod karong Hulyo 16.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph