Sugilanon: Diploma | SunStar

Sugilanon: Diploma

Time to read
1 minute
Read so far

Sugilanon: Diploma

Monday, March 20, 2017

Ernesto D. Lariosa
San Fernando, Cebu

MAY gidagit ang hangin. Usa ka puti nga papel. Milupad kini lutos sa gikusgon sa huyop sa unos. Wa pabintaha si Modesto. Iya kining gigukod taman sa ginhawa. Diploma ni Carlos nga iyang higala ug kauban sa klase. Wa na lang niya gukda ang iyaha nga gipadpad sad sa hangin halayo ngadto sa bungtod. Apan diploma sa iyang higala ang labawng importante kay gisalig kaniya sa pagdawat.

“Di ko makatambong sa atong gradwasiyon, Des, kay wa koy sapatos. Sugot na si Mr. De Dios, ang atong prinsipal.” Iya untang pahuwaman ang bag-o niyang elpo, apan di mahimo kay usa ra sad ang iyang sapatos. Miabot ang gradwasiyon sa Grade Six. Gipasangil lang nga gihilantan si Carlos, ang balediktoryan. Apan wa damha nga kalit miabot ang unos. Duol ra ang eskuylahan sa baybayon.

Nanglugpad ang mga papel. Hasta ang duha ka diploma sa iyang kamot nahulbot pa sa hangin. Mao kini karon nga siya naglutos sa diploma ni Carlos suot sa kabugangan, kanding-kandingan ug mga kabatoan nga nangapulpog sa giak sa iyang elpo nga sapatos. Mihangos siya. Nagisi ang iyang sininang puti sa hait nga mga tunok sa mga kanding-kanding. Nasapnan gyud niya ang diploma nga maayong pagka himuntog sa gamayng biyatilis. Iya kining gisapupo piit sa iyang dughan. Mibad-ay ang magul-anong panagway ni Carlos sa iyang alimpatakan.

USA ka buntag gipukaw siya sa iyang inahan. “Desto, enhinyero ka na suma sa balita sa radyo.”

“Ti... tinuod, Nay?!”

“Hoy, Desto, mamakak diay nang radyo!”

Milakang ang daghan pang mga adlaw. Samtang nagbarog si Modesto atubangan sa matahom niyang balay kalit may mihunong usa ka luho nga awto. May nanaog. Si Carlos ang kanhi suod niya nga higala. Mipahiyom ug migakos kaniya. Nahibaw-an ni Modesto nga gisuwerte si Carlos sa Mindanao. Nahimong malampusong negusiyante. Molakaw unta si Carlos, apan iyang gipugngan. Dali siyang misaka sa ilang taas.

Nanglurat ang mga mata ni Carlos kay iyang nabasa ang kanhi niyang diploma nga dugayng gitaguan ni Modesto. Gikuha ni Carlos ang iyang diploma nga nagdag na sa kadugay.

“Imong diploma, Bay, nga maoy simbulo sa imong paningkamot ug kakugi.”

Mipahiyom si Carlos nga nag-umog ang mga mata. (Katapusan)

Gipatik sa mantalaang Superbalita Cebu Marso 21, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments