Super Suroy: Kamanggahan nahimong atraksyon | SunStar

Super Suroy: Kamanggahan nahimong atraksyon

Time to read
2 minutes
Read so far

Super Suroy: Kamanggahan nahimong atraksyon

Thursday, October 12, 2017

KINSA bay magtuo nga sa yanong kamanggahan sa pamilya Cubrado nimu ma­kit-an ang bag-o ug nag-viral nga atraksyon sa probinsya sa Bohol?

Sukad sa pag-abli sa Jardin Necitas, ang naila nga Pilar Glowing Garden niadtong Septembre 27, wa na kini hubsi sa mga nibisita adlaw o gabii gikan sa nagkadaiyang lugar di lang sa Bohol apan lakip na sa ubang lalawigan.

Matod ni Vanessa Cubrado, tag-iya sa Jardin Necitas, nga ang gamayng bahin sa nahimutangan sa hardin sud sa 23 ektaryang kamanggahan sa ilang pamilya, wa matubui ug mangga bisan kapila na kini nila tamni.

“Supposed to be mag build kos akong dream house diring dapita kay nindot kaayo ang view, makita halos tanang mga lugar sa 2nd district sa Bohol, 180 degrees angle,” saysay ni Cubrado dihang nahinabi sa Superbalita Cebu.

Apan matod niya nga ang iyang kabarkada nga tag-iya sa MyLED Opto Cebu kinsa maoy supplier sa mga LED nga buwak sa lungsod sa Cordova ug Baybay, Leyte, kalit nga nisugyot kaniya nga butangan niyag buwak ang maong luna.

Niadtong Hulyo 25 ning tuiga, gisugdan og palambo sa iyang suod nga higala ang mga 700 metros kwadrado nga luna diin gitanom ang mga LED nga buwak ug human sa duha ka buwan nga pagpalambo, giablihan kini sa publiko.

20 mil ka mga buwak

Sud sa Jardin Necitas ang 15,000 ka mga punuan sa LED nga buwak sa tulips ug 5,000 ka mga rosas.

May lima ka mga kolor ang tulips: yellow, blue, red, pink ug purple samtang may pula ug puti nga color usab ang mga rosas.

Kon adlawan, sama sa maanindot nga tulips plantation didto sa Europa ang dapit ug mosamot kanindot ang mga buwak kon pasigaon na kin matag gabii.

Gawas sa mga buwak, may 55 ka mga LED-light cherry blossoms, ug mga swan ug flamingo nga ginama sa fiber glass.

Tungod sa kaanindot sa mga buwak sa hardin, di mominos sa 10,000 ka mga tawo ang mosaksi niini matag weekend samtang anaa sa 3,00 ngadto sa 5,000 ka mga tawo ang motan-aw niini sa weekdays, base sa ihap sa management.

“At first kay very overwhelming kay wa gyud ko nag-anticipate nga ingon ani kadaghan ang tawo nga dagsa gyud dayon. Nakurat ko pero eventually malipayon ang tibuok community kay kasagaran mga bakery, karendirya ug mga tindahan sa among ilingan, mahalinan sila, so benefited tanan sa community,” paambit ni Cubrado.

Palambuon

Plano ni Cubrado nga himuong resort diin adunay mga lawak katulgan ug pagkaunan ang Jardin Necitas.

Dugang niya nga himuan usab niya og viewing deck ang ubos sa hardin diin matan-aw sa publiko ang kinatibuk-an niini.

Gikatakdang mahuman ang view deck karong umaabot Disyembre.

Sa pagbisita ning mantalaan sa Jardin Necitas sayo ning semanaha, among nabantayan nga giporma ug “I U” ang mga rosas anaa sa tunga sa har­­din, pasabot ni Cubrado nga kini iyang paagi sa pagsulti og “I love you” sa iyang inahan nga si Necitas.

Dugang niya nga ang hardin iya sab halad ngadto sa iyang inahan kinsa maoy kasamtangang mayor sa ilang lungsod.

P30 ang entrance
Moabli ang Jardin Necitas sa alas 9 sa buntag hangtod alas 10 sa gabii diin P30 ang entrance fee apan gidili ang pagdalag pagkaon ug pagpanigarilyo sud sa dapit.

Unsaon pag-adto:
Gikan ka sa Sugbo mosakay og fastcraft paingon sa Tagbilaran unya mosakay kag traysikol padung sa terminal alang sa bus paingon sa Pilar ug sakay na usab og habal-habal paingon sa Jardin Necitas.

Pahimangno:
Kon ang Jardin Necitas lang inyong tuyo sa Bohol, mas maayo nga moabang mog sakyanan kon gusto mong magpgabii tungod kay way biyahe sa bus kon gabii, mahimo sad kamong maghabal-habal pabalik sa Tagbilaran sa P800 ang duha ka tawo.

Gipatik sa mantalaang Superbalita Cebu Oktubre 13, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments