Sugilanon: Kahimatngon | SunStar

Sugilanon: Kahimatngon

Time to read
1 minute
Read so far

Sugilanon: Kahimatngon

Tuesday, November 14, 2017

Chito E. Germino
Paknaan, Mandaue City, Cebu

SAMTANG nagsakay si Gina sa multicab padu­long sa Gaisano-Ayala diin siya mag-alagad isip salesgirl mitingog ang iyang selpon. Gipagawas kini niya gikan sa iyang shoulder bag. May mi-teks. Gibasa niya, “Taga PCSO ko. Makatabang ko nimo para modaog ka sa Lotto. Naa koy numero nga ihatag ko nimo kon makapadala kag P10,000 sa akong bank account.”

Gibatig kahinam si Gina karong buntaga. Mipahiyom siya. Gitan-aw niyag tagsa-tagsa ang mga kasakay niya. Way nagtan-aw niya. Way nakamatikod sa iyang kahinam. Duha na ka tuig siya nga wa na magpalit-palit og tiket sa Lotto. Sa nagsige pa siyag palit nag-mentin siyag numero base sa iyang adlawng natawhan. Ang labing dako niyang daog P800 ra, dihang upat ka numero ang nasakay sa iyang tiket. Niundang siyag palit og tiket kay nagduda siya nga ang duol ra sa luwag ang padag-on og dagkong kantidad o mga tawong kaila ug higala sa taga PCSO.

Unya kini karong teks, higayon na ni seguro nga makadaog siyag minilyon. Gipindot niya ang iyang selpon aron pagbalos sa mensahe. “Hatagi ko sa imong bank account number,” teks ni Gina ngadto sa taga PCSO. Mibalos dayon. Miguwa sa screen sa iyang selpon ang account number ug ang ngalan sa banko sa taga PCSO.

May hinipos nga kuwarta si Gina. Sa dalaga pa siya bisag nitampo siya sa galastuhan sa ila kay kabos ilang pamilya (tulo silang managsuon), dili siya gastador ug dili sab kapritsusa. Maong nakatigom siya, ilabi na nga gusto siyang makahuman og kurso. Nagtungha siya sa kursong Banking and Finance magabii.

“Bida no, kon kadaog ko kos Lotto nga P10,000 ray puhonan! Unya utso milyunes ngadtos diyes milyu­nes ang dibidendo, mausab man gyud unya ang dagan sa among kinabuhi. Si Papa Dencio nga drayber og taksi mapalitan nakog brand new nga taksi. Si Mama Nena nga labandera maablihan nakog laundry business. Ang akong mga igsuon magastuhan nako sa ilang pagtungha hangtod mogradwar sila sa kolehiyo.” kusog kaayo ang lupad sa handurawan ni Gina. Nagpahiyom siya sa iyang gidamgo.

Unya may misantop nga kahimatngon sulod sa iyang hunahuna. Hilom siyang nakapangutana sa iyang kaugalingon. “Kon may numero kong modaog og diyes milyunes pesos, nganong ibaligya man nakog diyes mil pesos lang?” Siya ray mitubag sa iyang kaugalingong pangutana.

“Ah! Lain na sab ning modus sa pangilad pinaagi sa teks!” tuaw ni Gina sa hilom. Gipawong niya ang iyang selpon. Gisulod pagbalik sa iyang shoulder bag. Ug gitunol niya ang iyang plete sa drayber sa multicab kay hapit na siya moabot sa Ayala. Nahimuot siya sa iyang kaugalingon nga hapit mailad sa nagpaka-aron-ingnon nga taga PCSO. Nakahunahuna gyud baya siya nga mag-widro og tipik sa iyang tinigom. Maayo gani kay giluwas siya sa iyang kaugalingong kahimatngon. (Katapusan)

Gipatik sa mantalaang Superbalita Cebu Nobyembre 15, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments