Tambagi ko Noy Kulas: Nakapaanak | SunStar

Tambagi ko Noy Kulas: Nakapaanak

Time to read
1 minute
Read so far

Tambagi ko Noy Kulas: Nakapaanak

Wednesday, December 06, 2017

Dear Noy Kulas,

Maayong adlaw diha. Tagoi lang ko sa ngan nga Mike, minyo ug usa ka negusyante.

Ang akong problema taudtaud na ni. Parte ni sa akong sekreto. Duna koy gipuyo nga babaye nga estudyante kaniadto nga akong gigastuhan ug gipuyo. Ang among arrangement nga human siya nako gastuhan magbuwag ra ming duha. Pero naproblema ko kay human sa iyang gra­duation, amo na lang nahibaw an nga mabdos siya ug bag o lang nanganak. Ako kuno ang amahan kay wa siyay laing uyab gawas nako.

Wa na ko makiglalis kay ni­tuo ko sa iyang story diri nako.

Unsaon man ni nako, Noy, nga ako man ang nakabutang nga amahan sa registration kay nisugot ko aron wa nay gubot. Ni-demand siya og sustento nga binuwan ug support. Ako ba ning ihatag? Makapugos ug makagukod ba siya?

MIKE

Mike,

Dihang nisugot ug nipirma ka sa birth certificate sa bata, imo nang giangkon nga ikaw ang amahan sa bata. Busa, maglisod ka na sa paglingkawas sa imong mga responsibilidad sa bata. Di ka na makapanghimakak nga ikaw ang amahan kay naa na may lig-ong dokumento nga magmatuod nga imo siyang anak. Mas lisod pa gyud na kay gawas sa sustento nga kinahanglan nga imong ihatag, imo usab siyang bahinan sa i­mong katigayunan kay iya ning ka­tungod isip imong anak.

Wa na may mahimo niana, sustetuhi ang bata kay imo kining responsibilidad isip iyang amahan. Hinuon, ang inahan di makapugos nimo kay di mo siya obligas­yon kay di mo kasado. Bisan giha­pon, aron di siya maghasol nimo, pakapini og alang niya. Kay imo na man nga giangkon nga ikaw ang amahan, akoha na lang gyud ang responsibilidad kay di ka man makalingkawas niana.

Pangandam lang usab kay basin moabot sa imong pamilya, labina sa imong asawa kining hitaboa. Di malikayan nga initially magubot kay seguradong duna siyay di maayong reaction kon makahibawo. Mao na ang angay mong pangandaman. Kon duna kay igong kaisog, tug-ani na lang ang imong asawa aron ka usa ra ang kasuko mahitabo. You be the judge kon maayo bang sultihan o di ang imong asawa. Usahay dunay mga butang nga angay nga magpabiling itago kay mas makadaut kon ibutyag.

NOY KULAS

(Alang sa imong problema, e-mail sa kulassuper@sunstar.com.ph)

Gipatik sa mantalaang Superbalita Cebu Disyembre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments