Balak: Handumon ko ang nawalang mga butang | SunStar

Balak: Handumon ko ang nawalang mga butang

Time to read
less than
1 minute
Read so far

Balak: Handumon ko ang nawalang mga butang

Friday, January 12, 2018

Lamberto G. Ceballos
Cawayan, Dalaguete, Cebu

HANDUMON ko ang nawalang mga butang
Sa akong kinabuhi nga nakalipay nako.
Ang akong pagkahimugso ning kalibutan
Balaanong gasa gikan sa Labing Gamhanan
Sa akong ginikanan nga tua na namalik na
Sa ginadamgo nga Gingharian sa Langit.
Ang liso sa unang gugma nga gitisok
Sa dughan sa linghod nga pagbati
Misubol sa katam-is sa unang halok
Bisan natagamtaman ko ang kaapla
Ug kapait sa kapakyasan kay ang matahom
Bulak sa akong mga mata gisiba gikutlo
Sa laing alibangbang.
Di ko makalimot sa bakyang kahoy
Pinalit ni Mama sa Carbon aron di ko
Magtiniil paingon sa eskuylahan.
Di nako angay kalimtan ang uniporme ko
Sa Boy Scout, ang barong tagalog
Ug panit nga sapatos nga gipalit ni Papa
Sa akong pag-gradwar sa elementarya.
 
Daghan pang mga butang nga nangawala na
Apan nakalipay nako sa akong kinabuhi.
Handumon ko gihapon sila kon moabot na
Ang mga takna sa akong paghinuktok.

Gipatik sa mantalaang Superbalita Cebu Enero 13, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments