Tambagi ko Noy Kulas: Problema sa yuta | SunStar

Tambagi ko Noy Kulas: Problema sa yuta

Time to read
1 minute
Read so far

Tambagi ko Noy Kulas: Problema sa yuta

Friday, January 12, 2018

Dear Noy Kulas,

Maayong adlaw nimo. Kining akong suliran di lovelife kay parte ni sa yuta nga among nasunod sa among parents.

Naa mi igsuon nga maoy arangan nga pagkabutang namong tanan. Kay arangan ug dunay kaya, maoy mag­hawodhawod. Sa binahinay sa yuta, nangayo siya og mas dako nga share kay siya kuno ang naggasto sa among parents. Tinuod bitaw siya ang gagasto, pero kami man sab ang gaatiman sa among ginikanan panahon nga masakit. Aron way daghang gubot, amo siyang giuyonan.

Karon naproblema mi kay karon nga nagplano na ming patitulohan ang among mga bahinan, mas gipadak an na ang iyang bahin. Bale nairog na nuon ang utlanan niya ngadto sa sikbit niya nga among igsuon. Karon nag away na sila kay namintaha na sab. Gipatawag siya sa barangay pero di na moatubang.

Kon uyonan siya sa among igsuon, mosamot ka gamay ang among bahinan kay mairog na man ang utlanan. Unsa may among buhaton aning among problema? Makiha ba namo siya sa korte? Unsa nga kaso ang among mapasaka? Nagkinahanglan mi sa imong tambag. Daghang salamat.

FRANK

Frank,

Abogado ang inyong gikinahanglan kon di siya motunga sa mga pagpatawag sa barangay kon nagplanong mong adto na lang sa korte i-settle. Mas maayo na lang sab tingali ngadto sa korte kay basin kanang iyang pagpamintaha mapakgang na.

Pero sa di pa na ninyo buhaton, pagtapok mong magsuon ug saboti ninyo ang pag-atubang ninyo niya aron inyong hangyuon ug pasabton. Kon di gihapon ninyo siya makombinser nga makigsulti ninyo, ang legal action maoy angay ninyong pagabuhaton. Sabo­ti ninyo daan ang gasto kay mobayad ra ba gyud mo sa serbisyo sa abogado.

Ayaw mo padala sa kainit sa ulo kay di maayo. Daghan ra ba sa mga kaso sa yuta nga nisangko sa duguong hitabo. Legal nga paagi ang dangpi.

NOY KULAS

(Alang sa imong problema, e-mail sa kulassuper@sunstar.com.ph ug rojval69@yahoo.com)

Gipatik sa mantalaang Superbalita Cebu Enero 13, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments