Sugilanon: Si Isko pulis | SunStar

Sugilanon: Si Isko pulis

Time to read
1 minute
Read so far

Sugilanon: Si Isko pulis

Saturday, January 13, 2018

Erlando Ligan Majan
Hipodromo, Cebu City

MISILBATO si PO2 Is­ko. Ug nagkatibulaag ang tanang mga sugarol nga nagpunsisok sa tagong eskina. Hantak! Modaog na sab siya karon kay hakpon man niya ang mga sensilyo ug saping papel. Sa usa lang ka pagsilbato sa gium-om niyang pito, malisang ug makuyawan ang tanang sugarol. Gani, bisag masiplatan lang siya mokurog ang mga sugarol sa iyang uniporme. Pulis god siya!

“Ania dinhi ang dakong suhol,” daw buang siyang nagkatawa sa naandan niyang buhat. “Ingon sila nga dako kuno ang suhol sa mga pulis, pero sa tinuoray, gamay gihapon. Utak-brain lang gamiton aron may saydlayn, saping malabo!”

Sugarol sab si Isko, apan dili sa hantak. Adto siya sa madyungan o bulangan. Modaog gani siya sa sugal morag magpista sa ilang dapit. Litsong baboy ug litsong manok magbaha sa mga talad. Tanang mga silingan moyukbo sa iyang pagka Santa Klaus sa maong okasyon.

“I-ampo ka namo kang Lord Jesus nga swertehon ka kanu­nay!” Ang mga palahubog mo­­­ba­yaw kaniya ngadto sa la­­ngit. “Idol ka namo! Angay kang ma-hepe sa inyong estasyu­nan!”

Mao usab ang asawa ug mga anak ni Isko, way problema. Giatiman siya bisan og magligid-ligid siya sa yuta sa tumang kahubog. Sapian god siya ug ang iyang asawa makapalit og mahalong alahas ug mga sapot. Tagsa og motorsiklo ang iyang duha ka ulitawong anak.

Saludo sab niya ang iyang mga kaubang pulis.

“For the boys! For the boys!” Mang-apod siyag sapi sa kauban niyang mga pulis nga nahibaw-an niyang may mga bisyo sab.

Wa siyay problema sa ilang hepe sa ilang estasyonan. Sapian sab kini ug may mga saydlayn sab.

“Kahayahay gyud sa tanang mga pulis!” hilom siyang nahimuot sa kinabuhi sa mga pulis. “Wa gyud ko masayop nga nisulod ko pagka pulis. Ang akong suhol ensakto rang ibayad sa mga utang.”

Pero nakaingon siya nga kuwanggol ang mga pulis sa ilang estasyunan kay way nakabadlong sa mga salbahis sa kadalanan. May mga adik nga manglabnig bag, selpon ug tablet. May manglugos, manulis ug mopatay.

KARON hubog na sab si Isko ug nag-ihap sa bagang sapi nga papel nga iyang nadaog sa dakong bulangan sa ilang dapit. Dili siya mag-uniporme basta manugal sa madyungan o sa bulangan. May nakapaniid kaniya. Gisundan siya samtang naglakaw sa dalan nga iyang gisubay ug giagian.

Sa usa ka hilit nga dapit giduol siya sa tulo ka tawo. Ang usa mibunlot sa iyang pistola gikan sa hawakan niini ug mition sa armas kaniya.

Nahasinta si Isko. Miantihay siya. “Pulis ko! Pulis ko!” Nagpaila siya.

Apan wa manumbaling ang tulo ka tawo. Gibunlot ang tanang sapi ni Isko. Misukol siya. Apan nagsunod-sunod ang mga buto sa pistola. (Katapusan)

Gipatik sa mantalaang Superbalita Cebu Enero 14, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments