NATULOG si Gina sud sa iyang lawak sa ikaduhang andana sa balay. Nahinanok siyag maayo. Apan sa kalit lang, iyang naamguhan nga dunay nihawok sa iyang aping ug mga ngabil.
Nakugang siya dihang iyang namat-an si Jerry, kapuyo sa iyang inahan, maoy niromansa kaniya.
Gikabay-an siya niini ug gipanghinol ang mga pribabadong bahin sa iyang lawas. Human niini, gitiunan siya og batangas knife ni Jerry ug gipahimangnoan siyang di mosulti ni bisan kinsa.
Samtang naa pa siya sa kakugang, igo na lang siya sa paghilak ug mosinggit unta siya og pakitabang, gisampungan sab ang iyang baba.
Mga alas 4 sa kaadlawon, gimandoan siya ni Jerry sa pagkanaog sa silong aron magluto og lugaw nga iyang ibaligya. Gipakigsultihan siya ni Jerry ug gitanyagan pa siyang hatagan og cell phone ug kuwarta. Apan wa gyud siya manumbaling sa akusado.
Mga alas 4:45, gimandoan siya sa pagpahigda sa akusado sa katre dayon gihuboan siya sa tanang mga sapot samtang nagtion kini sa iyang batangas knife.
Human niini, naghukas sab ang akusado ug nipatung kang Gina. Gibati og kasakit ang babaye dihang giangkon sa iyang ama-ama ang iyang pagkababaye.
Dihang natagbaw na si Jerry, iyang gimandoan si Gina sa pagkaligo, apan wa siya paminawa sa biktima. Hinunoa, nanghipos si Gina sa iyang mga baligya samtang naghilak.
Gusto unta siyang moikyas, apan ang ilang gate sirado.
Ang inahan ni Gina ug iyang igsuong babaye nga nanglakaw niana pang alas 3 sa kaadlawon, niabot sa mga alas 7 sa buntag. Nakabantay ang iyang inahan sa nanghubag niyang mata. Gipangutana siya niini kon unsay nahitabo.
Si Jerry, sa iyang bahin, nanghimakak nga iyang gilugos si Gina. Matod niya nga nibawos ang biktima kaniya human niya pakauwawi atubangan sa iyang mga higala.
Butangbutang lang kini kaniya.
Wa siya mohimakak nga duna silay panaghilawas ni Gina, apan ila kadtong sinabutan kay manag-uyab sila.
Katuohan ba ang gisulti ni Jerry? Posible bang manag-uyab gyud sila ni Gina? Kon ikaw ang pahukmon, sad-an ba si Jerry sa paglugos sa iyang humagbos?
Hukom sa kasong rape
Napalgang sad-an ang akusado sa pag-rape sa biktima nilang silingan. Bisan tuod kon way suga, ang dan-ag sa sugang dagitab gikan sa balay sa ilang silingan igo na kaayong banwag ug mailhan ang nawong sa akusado. Gisilutan ang akusado og reclusion perpetua.