Sugilanon: Bagyo

Pride Tumulak
Panangatan, Sogod, Cebu

NAGHAGUROS ang hangin. Kusog ang uwan. May mga punoan na sa kahoy ang naluka. Dulom ang kagabhion. Bagyo!

“Sige na, Walter! Kuhaa na ang mananabang. Manganak na tingali ko kay sakit na kaayo ang akong tiyan!” Naghilak si Estrella nga naglimbag-limbag sa gihigdaan katre sulod sa lawak.

“Sige, pugong lang gyud, ha. Layulayo ra ba ang ilang Inse Tebang.” Sa tingog ni Walter nagsaguyod ang tumang kabalaka.

Daling migawas si Walter sa lawak. Gikab-ot ang kalong buli. Unya gikuha ang flashlight sa butanganan niini. Lagsik nga mikanaog sa kabilin nga balay.

Nabasa ang iyang nawong ug sinina sa misugat nga uwan. Gipugngan niya sa pikas kamot ang kalong buli aron di ipadpad sa kusog nga hangin. Gilatas niya ang kangitngit.

Sagol dagan ang iyang gihimo aron makaabot dayon sa balay ni Inse Tebang, ang bugtong mananabang sa ilang dapit sa Kansuhong, usa ka sityo nga nahimutang napulog lima ka kilometro gikan sa lungsod.

Ilong tuwapos na si Walter. Igo lang nakahuman sa hayskol sa lungsod kay nagsunod pagkamatay ang iyang ginikanan sa sakit. Kay bugtong anak, siya ang nag-atiman sa kabilin nga uma nga igong kakuhaan sa inadlaw nga pagkaon nilang Estrella ug uban pang kinahanglanon sa panimalay.

“Makabarog kaha ka, Walter, sa dakong responsabilidad isip bana ug amahan?” Daw nadungog pa ni Walter ang pagpakaubos kaniya sa amahan ni Estrella dihang namalaye siya sa babaye. Nagdalag kantalita ang mga pulong niini.

“Bitaw! Ikaw nga usa ka mag-uuma, mangasawa sa among anak nga hapit na unta makahuman sa kolehiyo!” dason sa inahan ni Estrella.

“Barugan ko ang akong responsabilidad sa tumang kalig-on. Isaad ko kini,” mapaubsanon nga nitubag si Walter. Ug way nahimo ang mga ginikanan ni Estrella kay hugot sila nga nagkahigugmaay.

Nakasal sila si Walter ug Estrella nga wa manambong ang mga ginikanan sa babaye. Wa gyud maayoni si Walter sa mga ginikanan sa iyang asawa. Wa gyud gani manuaw kanila ni Estrella sa bukid sukad sila nakasal.

Ug karon mao ang hustong panahon nga ikapakita ni Walter ngadto sa mga ginikanan ni Estrella nga wa siya magpasagad sa iyang tulubagon sa asawa. Basa na kaayo si Walter dihang nahiabot sa balay ni Inse Tebang. Ang manabang mikuyog dayon kang Walter human suginli sa iyang tuyo.

"Magdali ta, Walter, kay basig naunsa na ron si Estrella!”

“Oo, Inse. Wa ra ba siyay kauban sa among balay.” Diha gihapon ang kabalaka sa tingog ni Walter bisan kauban na niya ang mananabang.

BUNTAG SAYO. Mitiliis ang uha sa usa ka puya. Wa na ang bagyo.

Nakalukso sa kalipay si Walter. “Amahan na gyud ko! Amahan na gyud!”

Igo lang mipahiyom si Estrella nga nagsud-ong sa iyang bana nga nag-apong sa ilang anak nga naghigda sa iyang kiliran. Bisan luya pa siya, apan tam-is ang iyang pinahiyuman.

“Inahan na sab ko, Walter,” hinay nga namulong si Estrella.

Milabay ang duha ka buwan. Gibunyagan ang bata nga usa ka lalake. Mitambong ang mga ginikanan ni Estrella. Malipayon nga naghagwa-hagwa sa bata.

“Ampingi ninyo ang among apo, ha! Ayaw gyud pasagdi!” hapit magkadungan pagsulti ang amahan ug inahan ni Estrella.

Malipayon si Walter. Maayo na ang tinagdan kaniya sa mga ginikanan sa iyang asawa.

Milurang na ang bagyo sulod sa iyang kahiladman.(KATAPUSAN)