Sugilanon: Bagyo

Rodel C. Nuñeza

IGO lang nga naglantaw si Mr. Norel sa iyang mga silingan nga nanaod og banting sa ilang mga balay, pinaagi sa paghigot og dagkong pisi sa mga kanto niini ug gihigot usab ngadto sa dagkong mga punoan sa kahoy. Nangandam sila kay gibalita sa radio nga dunay bagyo nga umaabot nga kusog pa kay sa bagyong Ondoy. Moabot kini inigka gabii nii­ning adlawa.

Apan ang gipangbuhat sa iyang mga sili­ngan wala makatandog kang Mr. Norel, kay alang kaniya dili na kinahanglan nga mangandam pa siya ug ang iyang pamilya sa umaabot nga bagyo. Kumpiyansa siya nga ang ilang balay makasugakod kon duna man gayuy bagyo. Nagsalig siya kay dako man ang ilang balay. Pulos kini kongkreto. Gilibutan sab kini sa koral nga ginama sa hollow block. Habog kaayo ang maong koral, hapit gani motupong sa ilang balay, ilabi na ang likod nga bahin niini. Ang koral makadepensa na sa balay nilang Mr. Norel batok sa makusog nga bul-og sa tubig ug sa makusog nga hangin.

Nianang pagka gabii miabot ang bagyo. Kusog kaayo kini ug mipukan sa dagkong mga punoan sa kahoy. Wala magsilbi ang gihimong banting sa mga tawo kay nangaluad man ang mga kahoy nga gihigtan sa mga pisi nga nahigot sab sa mga haligi sa ilang mga balay.

Didto sa balay nilang Mr. Norel morag wala lay nahitabo, kay wala man matarog sa hangin ang ilang balay. Mora lag way bagyo, kay dili man nila mamatngunan ang huros sa hangin kay atua man sila sa sulod sa balay. Sirado sab ang tanan nilang mga bintana ug mga pulta­han.

Samang didto si Mr. Norel sulod sa iyang kuwarto nakadungog siyag mga tingog. May misangpit sa iyang ngalan. Sa iyang paglili sa bintana maoy iyang nakit-an ang pipila niya ka mga silingan nga buot manapon diha sa ila. Apan wala niya tagda ang iyang mga silingan. Dili siya buot nga anha kini mamakwit sa ilang balay. Samukan siya, ilabi na kon daghan ang mga bata. Unya, mahugaw pa ang ilang balay.

Dihang mihigda na si Mr. Norel kalit nabati niya nga may nahagsa. Nagtuo siya nga usa lang kadto ka punoan sa kahoy nga nabali tu­ngod sa kusog nga hangin, mao nga wala lang siya magtagad niini.

Pagkataudtaod, nakabati na sab si Mr. Norel nga may mikanaas. Sa iyang paminaw mora kinig bul-og sa tubig nga mianam pagsulod sa ilang balay.

Gisugo niya ang ilang katabang aron susihon kon unsa kadtong mikanaas.

“Hala, Nasyo, tan-awa kon unsay mikanaas!” ni Mr. Norel.

Milipot sa luyo si Nasyo ug nakita nga nahugno ang kongkretong koral sa luyo.

“Sir, nahunlak ang koral diri sa luyo!” mihulbaw si Nasyo. “Kusog kaayo ang bul-og sa tubig nga miagi sa nahugnong koral kay natumbahan og kahoy!”

Tungod sa kakusog sa bul-og sa tubig nga wala nay kalutsan diha sa atubangan nga bahin diin mipundo kini ug miabot kutob sa hawakan sa tawo ang giladmon.

Pagkakita ni Mrs. Norel niini mikalit siyag siyagit, “Tabang! Tabang kamo, mga silingan!”

Apan bisan giunsag singgit ni Mrs. Norel nga nangayog pakitabang sa mga silingan, wala nay silingan nga nakabati niya. Ang ilang mga silingan nakahiklin na didto sa usa ka dapit nga luwas sa tubig-baha.

(KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph