Sugilanon: Di na ko mag boxer

Elmer T. Moncion

Tuboran, Bien Unido, Bohol

SA NAG-EDAD pa ko og katorse anyos nangandoy ko nga mamahimong sikat nga ‘boxer’ kun boksingero. Sama sa akong silingan nga si Flash Maro nga nisikat sa among lungsod tungod sa kamaayo niya nga pagka boxer. Halos kada away ni Maro ibabaw sa ring malukapa gyud ang iyang mga kontra.

Kada Miyerkules ipahigayon ang maong matang sa paugnat sa kusog nga gipasiugdahan nila ni Ataw Mundin ug Rodrigues Boniel. Nakadugang gyud ang maong kalingawan sa kaalegre sa among lungsod kay mao man usab kini ang adlaw sa tabo sa merkado.

“Kini, Elmon, sukol ka ani? Tupong-tupong ra man mo,” ni Tarjun nga naghilot-hilot sa abaga sa iyang manok nga maoy ipaparang kanako.

Kay una ko pa man ning away, wa ko sila balibari. Pero sa pagkatinuod mibati gyud kog kakulba sa akong kontra. Kay haskan mang bahia og lawas kay taga isla man kini, anad og panagat. Samtang ako, morag baki sa saging sa kadaot, unya sip-unon pa gyud.

“Ang unang magsinukliay og mga kumo karong adlawa mao sila si Kid Elmon ug si Fighting Arkipo!” milanog ang dakong tingog sa anawonser nga nagagunit sa mikropono. “Si Fighting Arkipo boksidor nga mananagat, nanganti nga nak-awuton niya si Kid Elmo. Sa laing bahin, mao kiniy unang pagsaka sa ring ni Kid Elmo nga nangandoy nga mahimong sikat nga boxer sama sa iyang silingan nga si Flash Maro!”

Gitawag kami sa anawonser aron pasak-on sa ibabaw sa ring. Apan sa wa pa ko mosaka gisikma ko una og hurot ang akong sip-on nga natipun-og sa akong ilong, kay basin og ang akong sip-on mao unyay makasagabal sa akong pagpakig-away.

Didto sa ring gipahimangnoan kami sa referee bahin sa lagda sa boksing. Nangyango ming duha si Arkipo timailhan nga kami nakasabot.

Mibagting na ang unang rawon. Nindot kaayo ang akong porma. Ala Mohammad Ali. Ako ug ang akong kontra, nagbawos-bawos mig buhi sa among mga kinumo. Midyab ko ug gisundan kog estret ang nawong sa akong kontra. Gisagang niya ang akong estret ug gibawsan ko niyag aperkat.

Nagpadayon ang among sambunot ibabaw sa ring. Dihay mga higayon nga naigo ang akong nawong. Diha say mga higayon nga naigo ko ang tiyan ni Arkipo.

Apan wa damha ug nga wa ko kapugngi dihang miagas pagkalit ang akong sip-on. Mihunong usa kog sukmag aron pahiran ko ang sip-on sa akong glab. Apan maayo nakong pagkalipat, kay human kog pahid sa akong sip-on maoy nisunod ang kusog kaayong kumo ni Arkipo nga niigo gyud sa akong ilong. Maayo nakong pagkalukapa sa kanbas. Bisan nalukapa naningkamot ko sa pagbarog aron makigharong pagbalik sa akong kontra. Apan migrabe ang nangagas sa akong ilong. Sa akong pagtuo sip-on lang gihapon, apan sa ako nang pagpahid dugo na ang niagas. Nagsunggo ko nga naigo sa kumo sa akong kontra.

Misuliyaw sa pagpangatawa ang tanang manan-away sa ilang nasaksihan. Misurender na lang ko. Ngalingo-lingo kong nanaog sa ring nga morag wa nay umoy ang duha ka tuhod tungod sa kabangog pa nako nga naigo sa kumo. Pag-abot ko sa ubos naka-desider ko nga dili na lang mopadayon sa akong pangandoy. Di na ko mag-boxer. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph