Joel Lawas
Bawo, Sogod, Cebu
MIYAHAT si Ronron sa sekretarya sa ilang manedyer dihang miduol kini sa iyang office table. Mao pay iyang pag-abot sa opisina. Alas nuybe sa buntang na niadtong tungora.
“Good morning, Sir!” matod sa nagpahiyom nga sekretarya nga edaran na.
“Good morning!” mapahiyumon sab nga mitubag si Ronron.
“Paadtuon ka ni Sir Sandoval.”
Mibiya si Ronron sa iyang lamesa. Misulod sa dakong opisina sa ilang manedyer, si Willy Sandoval.
“Lingkod, Ronron. Importante ang pakigsultihan ko nimo.” Ligdong ang nawong ni Willy Sandoval. Ingon siya niini, katahaan pero duna siyay sekretong kinaiya nga maayuni sa kadaghanan sa iyang mga trabahante, ang iyang pagka palikero bisag nag-edad na siya og saysinta kapin.
“Nganong gipatawag ko nimo, Wil?” naandan na nga tawgon ni Ronron sa ngalan ang ilang manedyer kay suod na silang daan.
“Kuan, kining wa tingali ka malimot, Ron, nga ako ang nagpa-eskuwela nimo kay way ikagasto ang mga imong mga ginikanan. Ako ang nagpahuman nimo sa college. Ug ako sab ang nagpatrabaho nimo dinhi, ug gihatagan og dakong posisyon, ang pagka superbisor.”
Nagdiyong ang mga mata ni Ronron nga mitutok kang Willy. Nahibulong siya kong nganong gihisgutan niini ang natabang kaniya.
“Wa ko malimot nianang tanan, Wil. May dako kong utang kabubut-on nimo,” hapit di madungog ang tingog ni Ronron.
“Maayo kon mao, Ron. Simple lang ning ihangyo ko nimo. Mahimo kaayo nimo ni.”
“Unsa man na, Wil?”
“Buwagi si Teresa. Naibog ko niya. Karon lang ko mohangyo nimo, Ron. Unta di mo ako balibaran.”
“Pero minyo ka na, Wil! Wa kay maayong kaugmaon nga ikahatag kang Teresa!” hapit di makaginhawa si Ronron, sakit kaniya ang gipangayo ni Willy.
“Ako na kanang problema, Ron.”
Migawas si Ronron sa opisina ni Willy nga wa makahatag sa iyang pag-uyon. Giingnan niya si Willy nga hunahunaon pa niya.
Ambungan si Ronron. Husto sa barog ug panglawas. Daghan ang mga babaye nga nakagusto kaniya. Apan si Teresa ang iyang gihigugma ug gisaaran nga iyang pakaslan. Managsama silag edad, bayinte singko. Matahom sab si Teresa.
“UNSA?” Labihan ang kakugang ni Teresa dihang gisultihan siya ni Ronron sa tanan.
“Pabuwagan ko niya nimo tungod sa imong utang kabubut-on kaniya?”
“Naglisod kog desisyon, Teresa. Naglibog ko.” Miginhawa si Ronron og lawom. Nangaon sila niadtong tungora sa usa ka fastfood sa SM City.
“Angay kang mamili, Ron.” Naghilak na si Teresa.
Usa ka buntag. Misulod si Ronron sa opisina ni Willy Sandoval. Mapahiyumon si Willy.
“Nakadesisyon ka na gyud tingali, Ron?”
“Oo, Wil. Ug nia ang akong tubag.” Gitunol ni Ronron ang gikuptan niyang sobreng puti ngadto kang Willy.
Naniga ang mga mata ni Willy nga nagbasa sa sulat gikan kang Ronron. “Resignation letter?”
“Oo, Wil. Gimahal ko si Teresa. Di ko siya itugyan nimo nga hangol og babaye.
Magpakasal na kami!” Tuyhad ang lawas ni Ronron nga namulong. Unya migawas siya sa opisina sa ilang manedyer nga luag ang dughan. Nahanaw na ang kapuot. (KATAPUSAN)