Sugilanon: May kasakit sab ang pasko

Ernesto Dael Pacaña
Jasaan, Misamis Oriental

USA si Medel nga nahiagom sa masakit nga kagahapon panahon sa Pasko. Dili kini niya mahimong hikalimtan sa tibuok niyang kinabuhi. Ang panghitabo nagpabiling lab-as sa iyang panumdoman matag abot sa Pasko.

Si Medel ang sinaligan sa tag-iya sa pabrika kansang ulohan tua magbase sa dakbayan sa Sugbo. Dako ang iyang suweldo. Ngani, niadtong miaging tuig usa siya sa mga empleyado nga nakadawat og promosyon tungod sa maayo niyang performance. Busa, kontento na siya sa iyang suweldo nga gidawat matag bulan.

“Medel, malipayon na ko sa imong suweldo, kay pinaagi niini nakapalit na kitag mga butang nga atong gikinahanglan para sa atong bugtong anak,” pulong ni Sidra nga iyang asawa usa ka higayon niana. “Unsa pa man ang atong panganduyon? Duha atong kotse. Unsa pa may atong pangitaon?”

“Bitaw, Day! Sunod tuig motaas na sab akong ranggo sumala sa tabi-tabi sa opisina,” ni Medel. “Busa paningkamutan ko nga malipay ang among labaw.”

Apan usa ka adlawng Dominggo nakasuroy sa ilang balay ang usa sa iyang mga klasmeyt sa kolehiyo ug duna kiniy giagni kaniya.

“Medel, kanang imong trabaho, matigulang ka na lang di ka gihapon moasenso,” matod sa klasmeyt. “Tinuod, naay imong kotse, apan ulahi ka sa modelo. Tan-awa ko. Lima akong kotse ug pulos latest model.”

Mao ba?” ni Medel. “Unsa man akong buhaton?”

“Simpol lang, Bay. Maayo pang mokuyog ka kanako kay segurado nga makakuwarta ka sab og dako.”

Giagni si Medel sa iyang klasmeyt nga magkuyog sila sa pagpayuhot og shabu. Mipasalig ang iyang higala nga mokita siyag minilyon sa mubo lang nga panahon. Dili problema ang mga pulis kon mabahugan lang sila.

“Ang gikinahanglan mao lang ang kaabtik ug kini bugtian unya sa minilyon nga kuwarta nga sukad wala mo pa makita,” tam-is nga mga pulong sa iyang higala.

Nadani si Medel. Mi-file siyag leave nga usa ka bulan aron pagsulay sa katinuod sa gisulti sa higala.

Paglabay sa usa ka bulan namatikdan ni Medel nga tinuod gayud ang gisulti sa iyang higala, kay wala pa gani usa ka bulan nabahinan dayon siya og hapit tunga sa milyon ka pesos. Ug dinhi masayri ni Medel nga ang ilang trabaho mao diay ang pagpayuhot sa ginadiling mga druga. Busa nakahukom siya nga mobiya sa maong trabaho.

Ug niadtong Pasko sa milabayng tuig usa ka hitabo naglambigit sa iyang pagpayuhot og druga.

Ang bugtong niyang anak nga mao pay pagsugod pagtungha sa high school usa diay ka biktima sa druga. Wala siya magtuo tungod sa kalinghod pa sa panuigon.

Usa ka adlaw samtang kauban niya ang higalang tigpayuhot og druga, nakadawat siyag tawag sa telepono gikan sa eskuwelahan sa iyang anak. Ang tawag nagpahibalo kaniya nga ang iyang anak milukso gikan sa ikaduhang andana sa tunghaan. Ang bata dunay problema sa panghunahuna, butang nga gikatingad-an sa mga magtutudlo. Ug didto sa tambalanan, sumala sa mga doctor nga misuse, tiggamitan kini og shabu taliwala sa kalinghod pa sa utok niini.

“Naay mga bata nga kadali rang madaot ang utok kon makagamit og shabu. Ingon ini imong bata,” matod sa doctor. “Natural naguol ka. Kon duna kay angay basulon, kana wa lain on dili kadtong mga tawong nagpayuhot sa shabu.”

Daw nabungog si Medel sa gisulti sa doctor. Kinsa man siya? Dili ba tigpayuhot sab siya og shabu? Sa laktod nga pagkasulti, siya mismo ang kriminal sa iyang kaugalingong anak. Wala silay nahimo si Sidra gawas sa pagluom paghilak. (KATAPUSAN)