Tambagi ko Noy Kulas: 14th Worldwide Candle Lighting

DEAR Readers,

Tugoti kong ipaambit nako ninyo ang among malampuson nga pagsalmot sa 14th Worldwide Candle Lighting niadtong Dominggo sa gabii, Disyembre 12, nga among gipahigayon atubangan sa Cebu Provincial Capitol.

Ang among support group nga Hugs, pinangulohan ni Sr. Supt. Anthony Obenza, sa labing unang higayon, misalmot sa candle lighting. Una kadto nga gipahigayon gawas sa Manila kay ang kaulohan unom na man ka mga tuig nga miapil niini.

Ang kalihukan nga gipasiugdahan sa Compassionate Friends nga nakabase sa Illinois, United States, gitumong alang sa paghinumdom sa kabataan nga nangamatay sa nagkadaiyang mga sakit ug sirkumstanya. Dinhi sa Pilipinas, ang usa ka support group alang sa mga ginikanan nga namatyan sab og anak, nagpahigayon na niini. Ang Hugs, nga natukod lang niadtong Oktubre 2009 sa walo ka mga magtiayon, apil na mi sa akong asawa ga si Chelo, nakahukom sa pagsalmot niini.

Among napili ang Capitol tungod kay kon maghisgot kita og Sugbo, mao kini ang dapit nga identified kita kaayo. Busa, angay ug haom kaayo ang lugar. Tuod man, gibuligan sa Ginuo ang kalihukan, wa gyud mouwan niadtong Dominggo sa hapon hangtod sa gabii.

Gihimo namo ang usa ka hamubong programa, diin ang highlight mao ang pagdagkot sa mga kandila sugod sa alas 7 sa gabii ug pagbuhi sa mga balloon nga dunay mga ribbon nga gisuwatan tagsa sa mga ngan sa among mga anak.

Lakip sa mingsalmot ang magtiayong Thelma ug Dionesio Chiong, mga ginikanan nila ni Jacqueline ug Marijoy. Mipaambit si Mam Thelma sa ilang kasinatian ug gibati hangtod karon. Ingon niya nga 13 ka mga tuig na ang nakalabay apan hangtod karon naa gihapon ang kasakit ug kamingaw kay way ginikanan nga gustong mamatay ang ilang anak. We expect them to grow, marry and have kids, too, like us.

Natural, atol sa kalihukan, naa gyud ang hinilakay, labina gyud sa tagsa-tagsa namong pagdagkot sa mga kandila alang sa among mga anak inubanan sa Powerpoint presentation nga giandam sa magtiayong Bong ug Rowena Amores-Saberon.

Sa alas 8 sa gabii, among gipawong og tagsa ang mga kandila kay natapos na man ang oras alang sa pagsalmot sa Pilipinas niadtong higayuna. Namauli ming malipayon kay malampuson ang kalihukan nga among gipahinungod alang sa among mga anak nga nangamatay.

Mangayo sab kog pasaylo nga wa na ko mohisgot og balik kabahin sa kalihukan.

Nagpanagana ko sa pag-publicize kay una pa kadto namong higayon sa pagsalmot. Lisod ang pagpangandam. Sa sunod tuig puhon, we will have a full blast publicity. Unya, wa sab miy gipili, kabos man o adunahan. Kay pareho ra kitang tanan, masakitan sa kamatayon sa atong gimahal nga anak. In pain, kita ray makasabot sa atong gibati.

Busa, kita ra say magpasaw-anay.

Kadtong gustong moapil sa grupo, suwayi pag-open ang among Facebook account. Pangitaa lang ang Hugs. Sa mga ginikanan nga magsaulog sa Pasko sa labing unang higayon nga wa ang anak kay mipanaw na sa laing kalibutan, we are one with you.

NOY KULAS

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph