Tambagi ko, Noy Kulas: Biktima sa abuso (1)

Dear Noy Kulas,

Una sa tanan, belated Happy Valentine’s Day kanimo ug sa tanan nga nagsunod sa imong column. Dili gyud makumpleto ang akong adlaw kon di ko makabasa sa imong column. Ang imong mga tambag maoy nindot nga mga pagtulun-an labi na kanamo nga nasaag sa dalan sa kinabuhi. Ako diay si Dolores, 30, nagtrabaho diri sa Cebu.

Noy, kining akong suwat murag ikaduha naman siguro ni nako nga pagpatambag kanimo. Hinaut unta nga imo kong matambagan pag-usab. Kini bahin sa akong pagkatawo. Sa una sa bata pa ko, sexually abused ko sa among silingan. Wa ko nagsaba ani sa akong mga ginikanan kay iya man kong gihadlok nga duna kunoy dautang mahitabo kanila kon mosumbong ko. (Dili na nako i-detalye ang tanang nahitabo, Noy, unta makasabot ka.) Naundang lang to sa dihang namalhin among pamilya diri sa Cebu. Sukad adto, gihimo gyud nako ang tanan aron kalimtan ang maong stage sa akong kinabuhi: ang akong pagkabata. Nagdako ko nga mauwawon, hilomon, walay self-confidence ug naay gamay nga self-pity. Pero ako rang taguon ang tanan. Kada adlaw, murag magsul-ob ko og usa ka “maskara” ug ang tan-aw sa ubang tawo kanako, usa ako ka ehemplo sa usa ka buotang anak ug malampuson nga propesyonal. Apan wa lang sila kahibawo nga sulod sa akong kasingkasing, kanunay ko magmasulub-on.

Tungod sab adtong nahitabo nako sa bata pa ko, maglisod ko pagsalig sa ubang tawo. Usahay, i-blame nako akong kaugalingon sa mga kalisod ug failures sa akong kinabuhi. Wa pud ko makasuway og uyab-uyab. Mahadlok ko, Noy, labina kon mahibaw-an sa lalake unsay nahitabo nako sa akong past. Naa to’y kausa nga maorag gitupo-tupo ko sa akong ka-officemate sa usa ka lalakeng empleyado sa among kompaniya. So, maorag nagsuway-suway sad ko. Apan sa among office party, iya kong giagda og kiss, pero nibalibad ko, nangurog ko dayon nag-excuse lang ko nga labad akong ulo. Niuli dayon ko sa amoa. Di ko kamao mo-reciprocate sa pagtagad nga gihatag niya nako. Di man sad ko bati og nawong, naa man pud mangulitawo nako, pero di ko kahibawo kon kiligon ba ko sa lalake o tungod lang ba ni sa kahadlok.

Di man gyud na kalikayan nga mosud gyud ang topic sa lovelife labina sa mga company outings or get-together ug kon magtapok na mi sa akong mga higala unya mag-istorya bahin sa among kinabuhi. Kon pangutan-on ko, maglimod ko dayon ingon nga naa sa una pero wa gyud diay. I’m such an awful, chronic liar, Noy. Mag-regret ko kon mag-lie nako nila. Maorag di kaya sa akong konsensya. But because of the “mask” that I wear, maora ra og natural ang tanan. Mao nga ako gyud nga pugson ang pagkalimot sa nahitabo nako sa una, aron di na ko maglagot sa akong kaugalingon. How I wish nga maka-travel ko og balik sa kadto nga panahuna, ug akong usbon ang mga nahitabo, aron nindot ang akong present. Pero wala man tay kontrol sa mga panghitabo. Usahay mangutana ko sa Ginuo, nganong nahitabo pa man to nako? Unsa may plano Niya nako? Kanunay man ko mag-ampo Kaniya aron sa kalinaw, apan ang mga balita tungod sa mga batang sexually abused maoy makapahinumdom kanako sa akong pait nga kaagi. (sumpayan)

r(kulassuper@sunstar.com.ph)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph