Tambagi ko Noy Kulas: Wa kauyon ang friends

DEAR Noy Kulas,

Maayong adlaw diha kanimo, Noy. Ikaduha ni nakong patambag nimo kay maayo man kaayo ka motambag gud. Sakto gyud kaayo imong mga tambag. Mao nga karon magpatambag pud ko nimo bahin sa akong uyab.

Love man kaayo nako akong uyab, Noy, apan akong mga amiga di sila ganahan sa akong uyab kay maorag dili kasaligan og nawong. Maora adik og nawong. Unsaon man ni nako, Noy. Love man kayo nako siya. Usahay makahuna-huna lang kog dautan.

Kon buwagan nako siya, maluoy ko kay mohilak man, Noy. Dugay na ra ba mi ani. Two years na. Unsa man akong angay nga buhaton, Noy? Naay nanguyab nako nga gwapo kaayo. Apan wala man sad koy love ato, Noy, oi. Ngano man mas love man nako akong uyab karon?

CONFUSED

Confused,

Maayong adlaw diha nimo. Salamat kaayo sa imong pagsuwat. Kini bang panag-uyab nga hilabtan sa mga higala di sab maayo kay sagad ra ba, mo-judge kita base sa appearance bisan wa kita makaila sa tinud-anay nga pagkatawo. Nabiktima na gani kog kausa ini kaniadto. Nangayog sorry ang mga barkada sa akong GF but uwahi na kay nahitabo na man ang break-up. Bisan ang akong mga higala kaniadto magbuot sab sa mga amiga, kon kinsay sugton o ibasted sa mga nanguyab.

Ingon niana man gyud ang tawo. Manghilabot sa kinabuhi sa uban bisan kon di gyud sila angay mobuhat niini kay kagawasan nato ang pagpili kinsay atong higugmaon ug ikauban.

Di ra ba dayon tagdon sa mga barkada kay mi go against sa ilang gusto. Hangtod nga madala na lang sa peer pressure.

Kon ang nawong lang sa imong uyab ang ilang gibasehan nga maorag adik unya di man kaha kana tinuod, nganong maminaw ka man nila? Mas nakaila ka sa imong uyab kay kanila kay kamo man ang kanunay nga mag-uban. Siyaro na man sab sa duha ninyo ka mga tuig nga panag-uban, wa ka pa gyud kaila sa tinud-anay niyang pagkatawo? Look for signs sa addict kay naa man gyud nay mga timailhan. Ayaw lang sab i-reject ang pagduda sa imong mga higala kay basin tinuod sab. Mas maayong managana ka.

Ang gugma moturok di tungod sa physical appearance, kon di tungod sa pagkatawo.

Superficial ra kaayo ang physical appearance nga maoy mamahimong gamot sa gugma.

Molipang ang gugma diha sa pagsinabtanay, pag-compliment sa personality sa duha ka tawo. Naa sab ang trust nga usa gyud sa labing maayong ingredient. So, kon nahigugma ka nianang gidudahang adik kay sa niadtong gwapo, di na angay ikahibung. Fleeting ra kaayo ang physical appearance. Kon di magkasinabtanay, mawagtang ra gyud na.

NOY KULAS

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph