Tambagi ko Noy Kulas: Yuta

Dear Noy Kulas,

Ngano kaha nga dunay mga tawo nga hakog kaayo bisan imo siyang kadugo? Ako si Titing, taga probinsya sa Sugbo. Ang akong problema mahitungod ni sa yuta nga among gibahin nga magsuon.

Amo na ning napasukod ug nabutangan na og mga utlanan kay maoy among nasabutan nga magsuon. Apan ang usa namo ka igsuon niangal kay kuno gamay ra ang iyang bahin kay daghan kuno siya og anak. Gusto niya nga padak-an an iyang bahin kay mag-unsa na lang ang iyang pamilya nga kagamay sa iyang bahin. Sa amoa, siya ang pinakadaghan og anak samtang ang uban nakong mga igsuon, way anak.

Nahimo namo ning away kay moinsister siya sa amoa. Ngano diay kon daghan siya og anak, mao diay na ang basehan sa pagbahin sa yuta? Isog kaayo siya namong magsuon. Noy, unsa kaha ang among buhaton aron mi mahusay ug malikayan nga modako ang away? Pwede namo ni siyang ikiha og harassment?

TITING

Ting,

Aron maklaro niya ang tanan kabahin sa pagbahin, pag-atubang mo sa barangay. Adto moreklamo sa lupon kay mao na silay mopatunga sa mga kasungian nga sama sa inyoha, kabahin sa yuta.

Bitaw, ang basehanan sa pagbahin sa yuta di ang gidak-on sa pamilya sa manunod, kon di pila ka buok ang manunud ug bahinon nga patas ang matag usa. Kon ang yuta tulo ka hektarya, tulo sab ang mosunod, tag usa ka hektarya ang kabahinan sa matag usa, bisan unsa pa ka dako sa pamilya sa mosunod kay ang gitan-aw niana mao ang pag-angay sa pagbahin sa yuta.

Ayaw ninyo tubayi kon mangisog kay daghan nang mga hitabo diin napatud-an og dugo ang yuta tungod sa panagsungi. Ang labing maayo mao ang pag-estorya atubangan sa lupon kon di mo mahilot sa inyong mga ginikanan, kana kon buhi pa. Kon di siya makasabot, pasagdi, ayaw tubayi aron di magdako ang away ninyong magsuon.

NOY KULAS

Alang sa imong problema, e-mail sa kulassuper@sunstar.com.ph ug rojval69@yahoo.com

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph