Editoryal: Semana Santa

Sunday, April 17, 2011

ALANG sa mga Kristiyano, pormal na ang pagsud sa pag-oserbar sa Semana Santa human sa Bendita sa Lukay o Palm Sunday kagahapon.

Nasayod na kitang tanan nga ang Semana Santa maoy tinuig nga pag-obserbar sa pasyon ug pag-antos ni Ginuong Jesu Kristo sa Krus.

Have something to report? Tell us in text, photos or videos.

Gihandom kini kanunay aron paglab-as ug pagpalig-on sa atong pagtuo ug ang pagkamatay ni Kristo nagpakli sa bag-ong testamento sa relihiyusong kasaysayan.

Ang Semana Santa usa ka reliyusong kalihokan nga naghatag kanato og paglaum nga dunay kaluwasan ug ang pagbalik sa Ginuo aron ‘paghukom sa mga buhi ug mga minatay.’

Daghang halawom nga tugkarunon sa mensahe sa atong kinabuhi diha sa pagkabuhi, pagkamatay ug ang pagbalik ni Kristo.

Semana karon sa pagpamalandong.

Sa pikas bahin, labi na sa di mga reliyuso, ang Semana Santa timaan sa paglulinghayaw tungod sa kahataas nga bakasyon.

Daghang molarga pauli sa ilang probinsya, panahon sa reunions ug kanunay puno ang beach resorts.

Ang kagamhanan nipa-alerto sa awtoridad ug gipahigpitang transportasyon alang sa kaluwasan gipaabot nga daghang mobiyahe sugod karong adlawa.

Ang Department of Health (HOH) hugot usab nga nipasidaan sa mga deboto sa paglikay sa risgo sa pagpenetensya - tumang pagbuwad sa adlaw, pagpuasa ug pagpasakit sa kaugalingon.

Maayo nga ang pagtimaan sa Semana Santa balanse. Samtang naglingawlingaw, di usab kalimtang ang reliyusong kalihokan - ang balaang kabilin nga nagdugtong sa atong panahon.