Obenieta: Pagpataas sa kamot

Friday, October 28, 2011

GATINGA, gadiwalwal ang dila. Ingon ini intawon ang gaantos nga himatyon. Pastilan, kini pod baya mao’y kahimtang sa atong publikong mga eskwelahan karon: lupig pa’y lubnganan sa mga ginikanan ug kabataan nga gadamgong kaugmaon nga masanagon.

Bitaw, sayod ta nga sagad layo’g maabtan ang mga tinun-an sa mga pribado nga tunghaan diin mga anak sa arang-arang nga pagkabutang mao ra’y makapahimulos. Alaot intawon ang mga kabos nga ulahi kanunay sa mga sa maayong pamaagi sa pagtudlo ug pagkat-on. Dayag nga maglisod gyud pag-uswag ang atong nasod padulong sa kalamboan kon ang pipila ra mao’y mabulahan.

Have something to report? Tell us in text, photos or videos.

Pastilan, kon wala’y kabag-ohan nga mahitabo sa atong mga public schools, dayag nga padayong magtinggkagol sa urom ang nasod nga giabat sa kalisod.

Dinhi sa dakbayan sa Sugbo, kuwang na lang tawon mangayo’g limos si Mayor Michael Rama nga gapakiluoy aron maluwas ang subo nga kahimtang sa mga tunghaan nga pang-publiko.

“Nagpatabang gyud ta kay daghan kaayo og atimanonon uy,” matod pa ni Rama. “We need people to help kay tabangonon kaayo ang atong mga eskwelahan.”

Gikan sa iyang pagduaw ug pagsusi sa kahimtang sa mga public schools dinhi sa atong dakbayan, gikataho nga naminghoy si Rama kabahin sa hagbay ra natong nahibal-an nga mga suliran sa atong mga magtutudlo ug sa ilang mga tinun-an: kakuwang sa mga lawak kun classrooms, kanihit sa seguridad, ug kadaot sa panglawas samtang hugaw ang palibot.

Sigon pa nahagdaw natong kasayoran, gidapit ni Rama ang duha sa kanhi sakop sa konseho—silang Jocelyn Pesquera ug Manuel Legaspi—nga nakasinati na pagdumala sa committee on education sa City Hall.

Dayag nga bisan nasinati na nilang Pesquera ug Legaspi ang naandang mulo gikan sa mga tunghaan, mahulog nga dili gihapon sarang ang ilang kahanas sa paglukdo sa gibug-aton ning nasudnong labad. Tataw nga dili igo ang kahibalo sa atong kadagkoan aron dili padayong masukamod ug mahay-ad ang kahimtang sa atong mga public schools.  

Gitataw ni Rama nga sublion na pod nilang Pesquera ug Legaspi ang pagpangita’g pamaagi nga dili padayong matiurok ang mga ginikanan, mga magtutudlo, ug mga kabataan. 

Bisan pa’g boluntaryo ilang serbisyo kay wala’y sweldo, padayon lang pod kuno nga mangalagad silang Pesquera ug Legaspi aron intawon dili madat-ogan si Rama sa gibug-aton sa iyang kaakohan isip amahan sa atong dakbayan.

Bitaw, bisan pa’g makaopaw kining hinungdan sa iyang panghupaw, dalaygon pod baya ning pag-angkon ni Rama nga kayamukat gyud iyang agi kon siya ra’y saligan. Labing lisod kon ako-akohon ra niya ang pag-atubang sa tahas nga maluwas ang mga public schools aron lang ingnon nga lig-on siya ug angay saligan sa sunod piniliay.

(geemyko@gmail.com)