Obenieta: Taman sa ginhawa

Monday, October 31, 2011

WA'Ypuol ang iyang kahangol, ug wala’y kinutoban ang iyang kumbira. Bahala’g niwang, baskog ug lagsik ang iyang pagkabagsik. Ay, kamatayon! Gatingsi kanunay samtang gawarawara ang kanahan sa iyang gasinaw nga wasay.

Kon atong suhiron ang mga kasayoran gikan ning basahon nga imong gihuptan, lagmit manghuy-ab ka sa kalaay. Gabalik-balik ra gyod intawon ang inadlaw nga talaan sa mga alaot nga mitaliwan sa laing kalibotan. Paminawa, ug panguros kabahin ning mga subo nga panghitabo bag-ohay lang: “Sikyu gitadtad patay sa trabahante.” “Minero gipatay sa iyang kauban.” “Lalake nakuryentihan, `nalitson.’” “Negusyante naapil sa pagkasunog.” “13-anyos gipatay.” “3-anyos napusilan sa silingan, namatay.” “Dalagitang naghikog mibahad.”

Have something to report? Tell us in text, photos or videos.

Bitaw, bulahan gyod ang mga tigbuhat og lungon, tag-iya og punerarya, tigkawot sa lubong, ug ang mga tig-ampo alang sa kalinaw sa mga kalag kun mananabtan. Ay, kanunay gyod duna sila’y hinungdan nga maharuhay bisan pa’g labing daghan ang gaping-it sa kalisdanan, kangulngol, ug kaguol.

Pastilan, dawaton na lang tawon nato nga kitang tanan dili gyod ta makaikyas sa mahimong dangatan bisan magtuwad-tuwad pa ta’g luhod aron mangiyupo nga makalikay ug makaikyas sa daotan: Kapintas. Katalagman. Kasakit sa panglawas.

Ay, ayaw na lang pangutana nganong mongaab gyod ang matag bata nga mahimugso. Sa pagkahabwa sa sabakan sa inahan, lagmit nadunggan ang hagawhaw nga pasidaan sa manulunda kun anghel nga magbalantay kabahin sa mga pagsuway sa matag kulba-hinam nga gutlo ug gutling sa atong kahigmata ug kahinanok.

Apan samtang kanunay manghulga ang pagsingabot sa kataposang gininhawa, sa gusto nato’g sa dili, dakong tahas pod nato kon unsaon paghatag og kahulogan ug kamahinungdanon ang atong kinabuhi. Kay lagi kas-a ra ni ug dili sama sama sa iring nga mahimo kunong mabanhaw og kasiyam, kinahanglang tilokon gyod nato ang kaayo, katahom ug kalipay nga atong mahagdaw dinhi ning sa “walog sa mga luha,” sumala pa sa mga balaknon. Matod pa sa mga maalamon, wala’y pulos ang kinabuhi kon wala ta’y katakos pagpaambit niini sa uban, labi na gyod sa mga gaantos sa kamingaw, kagutom, ug kauhaw.

Kay kon usikan ra nato ang kadiyot nga paglabay nato dinhi sa kalibotan—pinaagi sa pagwaldas sa kahakog, kasina, kataslak, kapungot, ug kaminghoy—mao ra’g gapangiyod ta padulong sa bukogon nga gakos sa berdugo.

Sa atong pagsaulog sa kalag-kalag, hinaot ang tanang mitaliwan nga gapabilin sa atong dughan modumdom nato sa dan-ag sa ilang maayong binuhatan. Hinaot ang mata’g kandila nga atong dagkotan sa paghandom moiwag pod sa atong malaumon nga pamalandong ug panglantaw labaw sa kadulom ilawom sa atong tabon-tabon.

(geemyko@gmail.com)