Obenieta: Pagpaambit, pakiglambigit

Sunday, November 6, 2011

HAPSAY ug wala’y sabod. Ingon ini nga kinabuhi mao’y sagad nga tuyo nato. Wala’y sakit sa ulo. Lisod na kon magdugangan pa atong labad pinaagi sa pagtagad sa mga panghitabo sa atong kasilinganan. Bitaw, bisan pa’g magkaguliyang atong palibot, kinaiya gyod nato nga maglikay ug dili mag-apil-apil sa kagubot.

Apan luwas ba gyod ta kon lahi ug lihay ta sa gidangatan sa uban? No man is an island, wala’y tawo nga isla, matod pa sa usa ka magbabalak. Buot pasabot, dili ta layo sa isig usa. Tipik ug kabahin kita sa kinatibuk-an. Ay, kon masunog ang balay diha sa duol, dili kaha malakip imong gipuy-an kon ang dilaab imo lang pasagdan?

Have something to report? Tell us in text, photos or videos.

Bisan unsaon pa nato’g likay, maangin ra gihapon tang tanan kon mag-iyahay ra ta og paningkamot alang sa kaugalingong kaluwasan. Ug dayag nga kini mao’y hinungdan nganong naa gihapo’y manginlabot alang natong tanan. Bahala na’g kuyaw, naa gihapo’y takos maglantaw kon unsa’y gibuhat sa uban nga mahimong makabaraw sa kahapsay ug kalinaw.

Bisan wala’y bayad, andam ug tagana gihapon sila og higayon aron makatabang pagpakgang sa mga buloyagon nga binuhatan.

Kini mao’y katuyoan sa mga sakop sa Community Investigative Support (CIS), usa ka hugpong sa mga volunteers nga nanaad sa pag-amot sa ilang kahibalo ug kaisog bulig sa tumong ug tinguha sa atong kapulisan. Kay sigon pa sa giangkon sa usa ka opisyal, “No amount of skillful diligent police work can effectively aid in crime prevention without the active participation of the community.” Bisan pa kuno sa panikaysikay sa mga pulis, lisod ang pagsikop sa mga malapason kon dili mosalmot ug makiglambigit ang katilingban batok sa mga daotan.

Tuod man, sulondon gyod ang pagkahimantayon kon kini usa ka pamaagi sa pagbantay dapig sa katilingbanong kaayohan. Mao nga angay gyod nga magpasalamat ta sa mga volunteers sa bisan unsang kalihokan, ug manghinaot nga managhan pa ang sama nila nga wala’y pagduha-duha sa paggahin sa ilang panahon ug panigkamot alang sa kabulahanan sa kinabag-an. Labi na nga dili maato sa atong kagamhanan ang pag-atiman sa dili maihap natong mga suliran, gikinahanglan gyod tuod nato ang pagbulig sa mga takos mohalad sa ilang pangalagad.

Sayod ta nga samtang gakagidlay atong nasod sa kalisdanan, mosamot pod nga mahinayak pagkumkom sa balaod ang uban. Gawas sa kriminalidad, suki pod atong nasod sa hinanggaw sa atong kadagkoan nga gadugang lang sa bisan unsang katalagman nga sagad mao’y atong dangatan.

Wala’y pagduha-duha nga dili layo ang kauswagan kon mosanay ang atong kaigsoonan nga dili magdinawo sa ilang mahimo alang sa kaayohan natong tanan.

(geemyko@gmail.com)