Obenieta: Kalamposan labaw sa kulata

Wednesday, November 16, 2011

LAHOS sa langit gyud atong pagsaulog duyog sa iyang kadaogan. Kay saksi man ang tibuok kalibotan kon giunsa niya pagpakaylab atong bandera tugbang sa atong pinahangad nga agtang, bukad pod kaayo atong atay sa mapahitas-ong kalipay. Lupig pa’y gibayaw ta lapas sa dag-om, mao ra pod kita’y makakumkom sa mga milyones bugti sa dugdog ug liti sa iyang kumo.  

Simba ko lang, pananglit siya matingkangkang ug paludhon sa iyang kaatbang, lagmit labyog pod sa espidno atong pagbangotan. Mag-aligato gyud atong balikas lakip sa kahigawad ug kapungot nunot sa sa kapakyas, Yawa na, abi na lang tinuod nga walay nahot atong nasod. Kanunay lang alaot, pastilan! Basin makaingon ang atong kaparian, “Mirisi, gigabaan!” Kay dili ba naa pod baya’y mga binuhatan si Pacman nga dayag bantang pod sa panghinayaw sa simbahan. Kon tinuod ang mga hungihong, dili pod kuno papildi si Pacman sa iyang pagkabilyako atubangan sa kahamis ug kalab-as sa ubang babaye gawas sa kaanyag sa iyang kapikas nga si Jinkee. Bag-ohay lang, gipalanog pod sa usa sa dako’g tingog sa simbahang Katoliko nga dili kuno maayo ang kamangtas ni Pacman sa iyang pakig-away. Gadasig kuno ta sa kapintas samtang gapanilap ta sa tigi sa kulata.

Have something to report? Tell us in text, photos or videos.

The Church accepts the fact that there’s boxing, but it does not endorse, much less promote it, because of the physical violence…” matod pa ni kanhi Lingayen Archbishop Oscar Cruz.  

Sa atong pagsaksi sa gipasundayag nga pagkabanggiitan ni Pacman, ay, apil pod kuno ta nga gabulig sa sa lawasnon nga pagpasipala samtang gapista ta ug gaampo sa pagkalup-og sa iyang kasangka.

Tinuod pod baya nga usa ka “temple of the Holy Spirit” ang atong lawas. Apan mora’g nataligam-an man sa ubang kaparian sama ni Cruz nga labaw nakapagusbat ning maong templo ang kapit-os sa kadaghanan. Bisan unsa na la’y buhaton aron dili mabuntog sa kagutom. Dili lang ang pakigharong diha sa boxing ring mao’y kadangpan sa uban nga wala na’y kapaingnan. Naa’y mobaligya sa ilang kaugalingong lawas ug naa’y molapas sa balaod. Labing maayo tingali kon duyogan ta pag-ampo sa atong kaparian nga dili na unta mag-agad atong kalipay ug katagbaw diha sa kaisog sa atong mga kaigsoonan aron magpabantang sa kakuyaw.

Gipahinumdoman pod baya ta ni Pacman nganong kinahanglan tang mosalig sa Kahitas-an samtang siya manguros sa dili pa sugdan ang suntokanay. Motumaw pod baya og kalit ang kalinaw.  Mohunong og ahat ang buroka sa pamolitika. Moundang, bisan sa makadiyot lang, ang kagubot sa mga rebelde ug mga sundalo. Ug lakip sa mga tulisan ug kawatan, lagmit nangaliya pod ang ubang pari nga ang atong nasudnong kalamposan dili lang unta kutob sa maayong palad ni Pacman. (geemyko@gmail.com)