Obenieta: Pagkat-on sa pagkamatinud-anon

Friday, November 18, 2011

LABAW pa sa langit kon mosanay ug mopatigbabaw dinhi sa yuta ang mga matinud-anon. Naa’y pipila apan sagad piskaton ug puno sa muta ang atong pagpangita ug pagsaksi sa mga bulohaton nga mopahayag sa atong pagtan-aw ug pagsalig sa atong kadagkoan.

Samtang wa’y hunong ang paglimbong kun pagpanikas, dayag nga daghan ang wa’y kurat duyog sa wa’y puas nga pagpangidhat ni Satanas. Kinsa’y maayong hangdan ug angay natong saligan? Kinsa’y takos nga tukma natong tuhoan?

Have something to report? Tell us in text, photos or videos.

Ay, dayag nga daghan nato ang nakasinati na—dili lang kausa apan kadaghan—nga nabulhog na ang panglantaw kabahin sa binuhatan sa atong kagamhanan. Sayod ta nga saksi bisan ang buta kon nganong padayong nahagba ug nakunhod ang pagtahod nato sa atong mga kadagkoan nga nitupong na sa mga duwende nunot sa ilang kapakyas pagsukod sa kaugalingon tugbang sa gitas-on sa ilang katungdanan.

Bisan ang mga pamuno sa atong nasod—labi na si Marcos, Estrada, ug Arroyo—wala gyod kalikay sa mga pamasangil nga gibato batok nila kabahin sa ilang pagkatikasan. Bisan kusganon ilang panghimakak, nitatak na sa pahak sa kadaghanan ang kadunot sa ilang pamunoan. Pila na ka piniliay ang nilabay, gapabilin gihapon ang hilom nga pagkadugta sa atong pagsalig sa kagamhanan bisan pa sa ilang paglanog sa mga panaad nga pakgangon ang mga kawatan ug limbongan nga mosanay sa nasodnong politika.

Kon gakampat ang balhiboong kamot sa mga nahimutang sa taas nga hut-ong sa pangatungdanan, unsa’y makapugong sa mga mga gagmayng’ ginoo sa ubos sa pagpanamastamas sa ilang gisaad nga mangalagad nato?

Gikataho bag-ohay lang nga gipasanginlan ang usa ka highschool principal dinhi sa dakbayan nga naapil kuno sa pagpanikas nga gipasiugdahan sa tulo ka magtutudlo aron makapasar ilang mga tinun-an sa National Achievement Test.  Nasayran pod nato nga gipakanaog na sa investigating committee sa DepEd Cebu City Schools Division ang gipasakang kaso nga grave misconduct ug oppression batok sa principal ug gikunhod ang sumbong niya isip usa na lang ka kaso sa simple dishonesty.

Ambot kon ang dishonesty kun panglimbong sa mga duna’y katungdanan matawag ba gyod nato nga simple kun yano. Hinuon, yano gyod tingali ning panikas kay mao ra’g mao may naandan sa kadaghanan, dili ba?  

Pastilan, mao bitaw ni hinungdan nganong wala pa gyod motubo atong nasudnong kahimtang bisan pa’g padayon natong gipainat atong paningkamot nga makaplagan ug mahuptan ang idlas kaayo nga kauswagan. Taliwala sa nagkagusbat nga panginabuhi sa kinabag-an, makalibat ang wala’y puas nga paglambo sa pipila. Nisamot kalisod ang mga wala’y nahot nga patay-gutom, apan nagtagbaw pod pagpabusdik sa ilang tiyan ang mga adunahan.

(geemyko@gmail.com)