Nalzaro: VIP treatment para kang Glo

SA UBANG nasud, kon ang ilang mga lider mapukan ug mapasakaan og kaso, ipabilanggo gyud. Sama didto sa South Korea, Japan ug sa mga nasud sa nabungkag nga Soviet Union Republics. Unya pasul-ubon pa gyud og uniporme sa mga piniriso  atubangan sa publiko ug itipon sa ordinaryong mga binilanggo. Wala gyoy special treatent. Apan dinhi sa ato, gitugutan nato nga ipa-ubos sa hospital  o house arrest. VIP treatment gihapon.

Si kanhi Presidente Joseph Estrada didto gibilanggo sa usa ka espisyal nga prisohan sa Laguna samtang gihusay pa ang iyang kasong plunder. Karon, si kanhi Presidente Gloria Macapagal Arroyo gitugutan sa korte nga ipa-ubos usa sa hospital arrest gumikan sa sakit nga gihambin niini. Bisan tuod og dili hulga sa iyang kinabuhi ang iyang sakit.

Apan gikinahanglan nga ipabilin una siya sa hospital. Ug ang mga sagoy pay pasultihon, layo ra sa tinai sa manok kining sakit ni Arroyo.    

MUG SHOTS

Nagubot usab karon nganong migawas sa mga media outlets ang mug shots ni GMA sa dihang gi-booked siya niadtong Dominggo sulod sa iyang lawak sa St. Luke’s Medical Center.

Gikuhaan og hand prints, finger prints ug mug shots si Arroyo. Kanang mug shots mao na nang pagkuha og hulagway sa usa ka tawo nga nag-atubang og kaso. Naa ang imong pangalan sa ubos unya naa ang criminal case number nga imong gi-atubang.

Pagka-ugma god nanggawas man sa pamantalaan ang maong mga hulagway. Mihangyo man god ang kampo ni Arroyo nga dili kini ipagawas sa media. Kay makaka-uuwaw kini. Pero mi-leak gyud. Kay ngano man god diay og nanggawas ang maong hulagway? Wala nay mahimo si Arroyo ani. Wala na siyay dignidad nga angayan pang protektahan. Gibaboy na siya og maayo ning administrasyon. Busa iya kining dawaton sa dakong pagpa-ubos.

PEKE NGA SAKIT

Matod pa usab nga gi-peke ni Arroyo ang iyang sakit aron himuon lang kining rason aron unta makagawas ug makalighot siya paingon sa gawas sa nasud ug maka-eskapo sa iyang mga kasong atubangon. Ang mga doktor ra niya maoy maka-klaro niini. Kining ato tagna-tagna ra man god ni. Mag-inartista man si Arroyo, wala na gihapon siyay mahimo. Ang iyang sakit maoy himuong rason nga magpabilin siya sa tambalanan. Pero mabuking ra gihapon kini sa kaulahian.

Morag first class hotel suit diay nga iyang giestaran. Tag P50,000 matod pa matag adlaw. Pero di man gihapon na siya magdugay nga magpasakit-sakit. Aw, magdugay siya, posibling mahurot lang ang ilang kuwarta. Ang ilang gikawkaw mahurot ra sa iyang pagpatambal. Maayo pag adto sa Southern Police District prison cell, libre pa.