Espinoza: Di kahuwat sa Mayo 2013 nga piliay

Monday, November 28, 2011

DI KAHUWAT. Morag di na kahuwat si Kong. Tomas Osmeña sa Mayo 2013 nga piliay. Gusto ni Kongresista Tomas nga masuspendi si Mayor Rama samtang imbestigahan siya sa kaso nga gisang-at ni Tomas sa Ombudsman sa giingon nga panghulga sa mga department heads.

Di ni pagdepensa ni Mayor Rama pero sa kadu-gayon nga akong siyang nakaila di ko makahinumdum nga nanghulga o nanghadlok siya sa iyang isig kaingon. Si Mayor Rama dili borokintong abogado sa nagpraktis pa siya.

Have something to report? Tell us in text, photos or videos.

Ingnon tang pung naay gamay hambug si Mayor Rama apan dili siya sama ni Tomas nga dili mopasulod og kapitan sa iyang opisina kay wa magsapatos. Wa usab gidungog si Mayor Rama nga di molamano sa iyang mga kritiko sa medya.

Si Mayor Rama bisag magkinaunsa makig-estorya lang gihapon sa iyang mga kritiko sa medya bisag gilat-an na siya. Bisag usahay masintunawo, mokanta lang gihapon si mayor basta makakupot og botsaka.

Kon mosakay ang Om-budsman sa gipangayo ni Kongresista Tomas nga isuspendi si Mayor Rama samtang dunay imbestigasyon nga pagahimuon mora na og human na ang piliay sa Mayo 2013.

Inig kasuspenso ni Mayor Rama natural nga ang mopuli nga acting mayor mao si Bise Mayor Joy Augustus Young, ang tawo ni Kongresista Tomas. Inig lingkod ni Bise Mayor Young nga acting mayor, luoy si Mayor Rama kay di na makagunit sa poder.

Ang opisyal sa dakbayan sa Sugbo nga akong nahibaw-an nga gikahadalokan ug gikaantipan sa mga empleyado sa city hall usa ra gyud, si kaniadto mayor Tomas Osmeña. Bisan sa iyang pagka-diktador, way usa ka empleyado nga mipasakag sumbong tungod kay nahadlok.

Ang katawhan nakahibawo na nganong nangugat og maayo si Kongresista Tomas nga dili maaprobahan sa konseho ang Php10.8 bilyon nga badyet para sa sunod tuig. Nakahibawo si Tomas nga makagamit si Rama ani nga kwarta alang sa iyang pamulitika.

Tungod sa kadako sa kantidad di gyud mahimo nga maaprobahan sa konseho ang maong proposed budget sa tuig 2012 alang sa dakbayan sa Sugbo. Subo hunahunaon apan igo lang sa panghupaw si Mayor Rama sa tanan nga gibuhat karon ni Tomas.

Hinuon, naa pay igong panahon nga makuha ni Mayor Rama ang simpatiya sa katawhan. Sa gibuhat ni Tomas ngadto ni Mayor Rama, ang katawhan nakasabut na nga dili ang ilang kaayohan ang giapas ni Tomas kon dili ang iyang kaugalingong pamulitika.

Si Tomas samtang buhi pa di gyud makadawat ni Mayor Rama nga maoy magdala sa renda sa dakbayan human siya mibiya sa BO-PK. Madumtanon si Tomas nga pagkatawo. Gani kon mahimo pa lang nga mag-eleksyon na ron dugay rang siyang mideklarar nga modagan pagka mayor batok ni Rama.

Sa laing bahin, mao usab ni ang mga pagduda nganong gibabagan ni Tomas ang proyekto sa kapitolyo nga Ciudad diha sa Barangay Apas. Tungod sa kadako sa kantidad sa maong proyekto maayudahan og pundo si Gob. Gwen Garcia alang sa iyang pamulitika.

Bisan tuod dako og tabang unya ang Ciudad alang sa pangempleyo sa way mga trabaho apan wa ni gitan-aw ni Tomas.

Ang iyang gihatagan og pagtagad mao nga di makakuha og dakong pundo si gobernadora alang sa iyang plano unya sa sunod piliay.